१९ पुस, एजेन्सी ।
राष्ट्रपतिमा निर्वाचित जो बाइडेनको जितलाई आधिकारिकता प्रदान गर्नबाट रोक्ने अन्तिम प्रयासमा रिपब्लिकन सिनेटरहरु लागेका छन् ।
बिना कुनै प्रमाण नोभेम्बर ३ मा भएको चुनावमा धाँधली भएको र आफूबाट नतिजा खोसिएको आरोप लगाउँदै आएका राष्ट्रपति डोनाल्ड ट्रम्पले अझै हार स्वीकारेका छैनन् ।
उनकै प्रमाण बिहीन आरोपको पछि लागेर जिम्मेवारीमा रहेका तथा नवनिर्वाचित केही रिपब्लिकन सिनेटरहरुले इलेक्टोरल कलेज मत सदनबाट हुने प्रमाणिकरणमा नमान्ने बताएका हुन् ।
टेड क्रुजको नेतृत्वमा ११ सिनेटर तथा निर्वाचित सिनेटरहरुले चुनावमा धाँधली भएको आरोप सम्बन्धमा कमिसन खडा नगरिएसम्म जो बाइडेनको जितलाई प्रमाणिकरण नगर्ने बताएका हुन् ।
उनीहरुले सदनबाट हुने प्रमाणिकरणका लागि १० दिन ढिलाइ गरिनु पर्ने बताएका छन् । जनवरी ६ मा सदनले बाइडेनको जितलाई प्रमाणिकरण गर्ने तालिका छ ।
टेड क्रुजसहितका ११ सिनेटर तथा निर्वाचित सिनेटरहरुले अवरोध गर्ने बताए पनि त्यसले सफलता पाउने सम्भावना भने छैन, अधिकांश सिनेटर त्यसको पक्षमा छैनन् ।
हार स्वीकार गर्न अस्वीकार गर्दै आएका राष्ट्रपति ट्रम्पको चुनावको नतिजा आफ्नो पक्षमा उल्ट्याउने कानूनी प्रयास प्रमाणको अभावमा अदालतहरुले खारेज गरेका छन् ।
त्यसपछि उनले इलेक्टोरल कलेज मतदातालाई प्रभावित गर्ने प्रयास गरे । त्यसमा पनि सफल नभएपछि नतिजा उल्ट्याउनका लागि सिनेटको अन्तिम विकल्प अपनाउने प्रयास गरेका हुन् ।
रिपब्लिकन सिनेटर मिट रोमिनीले आफ्नो पार्टी सिनेटरबाट भएको प्रयासको निन्दा गरेका छन् । बाइडेनले गएको नोभेम्बर ३ मा भएको चुनावमा ३०६ इलेक्टोरल कलेज मत पाएर जित हाँसिल गरेका हुन् ।
ट्रम्पले मात्रै २३२ इलेक्टोरल कलेज मत पाए । इलेक्टोरल कलेज मतलाई जनवरी ६ मा सदनले प्रमाणिकरण गर्नु पर्छ । बाइडेन र उपराष्ट्रपतिमा निर्वाचित कमला ह्यारिसले जनवरी २० मा शपथ लिँदै छन् ।
