१९ पौष, काठमाडौं । नेपाली कांग्रेसका केन्द्रीय सदस्य शेखर कोइरालाका दाजु निरञ्जन कोइराला ‘निरू दा’ को निधन भएको छ ।
पर्यटन व्यवसायी र तत्कालीन पर्यटनमन्त्री रामहरि जोशीको विज्ञ सल्लाहकारसमेत रहेका कोइरालाको आज नयाँ दिल्लीमा निधन भएको हो ।
कोरोनाबाट पीडित उनको आज बिहान ११ बजे निधन भएको शेखर कोइरालाका स्वकीय सचिव दिनेशचन्द्र थपलियाले जानकारी दिए ।
कोइराला विगत एक महिनादेखि नयाँदिल्लीको म्याक्स अस्पतालमा उपचाररत थिए ।
दाजु बिरामी परेपछि शेखर गत पुस १४ गते नयाँदिल्ली गएका थिए। उनी अहिले पनि नयाँदिल्लीमै छन्। थपलियाका अनुसार आजै ‘निरू दा’ को नयाँदिल्लीमै अन्त्येष्टि गर्ने तयारी छ।
निरञ्जन केशव कोइराला र नोना कोइरालाका छोरा हुन्। निरञ्जन नेपालको पञ्चायती शासनकाविरूद्ध प्रजातान्त्रिक आन्दोलन र राजनीतिमा सक्रिय थिए।
उनी नेपालका पर्यटन व्यवसायीसमेत हुन्। उनी पछिल्लो समय भारत नयाँदिल्लीमा रहेर व्यवसायमा सम्लग्न थिए।
निरञ्जनका दुई जना छोरा छन्। उनकी श्रीमतीको यसअघि नै निधन भइसकेको छ।
