२२ पुस, जनकपुरधाम ।
कोरोना महामारीका कारणले रोकिएको चालक अनुमतिपत्रको प्रयोगात्मक परीक्षा आजदेखि जनकपुरधाममा शुरु भएको छ ।
यातायात व्यवस्था कार्यालय, जनकपुरधामले शुरुमा मोटरसाइकलको प्रयोगात्मक परीक्षा सञ्चालन गरेको छ । भौतिक दूरी कायम गरेर जनकपुरधामको ज्ञानकूप संस्कृत नमूना माध्यमिक विद्यालयको ट्रायल सेन्टरमा परीक्षा प्रारम्भ गरेको यातायात कार्यालय जनकपुरधामले जनाएको छ ।
विगतमा लिखित परीक्षा पास गरेर बैंक भौचर काटेर सरकारी दस्तुर बुझाएका करिब ५ सय परीक्षार्थीको प्रयोगात्मक परीक्षा सञ्चालन गर्न थालेको यातायात व्यवस्था कार्यालय जनकपुरधामका प्रमुख विरेन्द्र साहले जानकारी दिए।
यसमा मोटरसाईकल, जीप, कार, ट्राक्टरसहितका सवारी साधनहरु रहेका छन् । आज मात्र १ सय ५० जनाले मोटरसाइकलको प्रयोगात्मक परीक्षा दिएका छन् । अब परीक्षाको कार्यक्रम नियमित रुपमा हुने कार्यालयले जनाएको छ ।
हप्ताको चार दिन अनलाईन मार्फत् दरखास्त संकलन गर्ने र त्यसपछि सिस्टमले नै लिखित परीक्षाका लागि आवेदकलाई जानकारी दिने कार्यालय प्रमुखले जानकारी दिए।
