२९ पुस, काठमाडौं ।
काठमाडौंको कागेश्वरी मनोहरा नगरपालिका–२ आलापोटमा खानेपानी वितरण गर्न दुई लाख ३० हजार लिटर क्षमताको ट्याङ्की र फिल्टर निर्माण गरिएको छ ।
वाग्मती प्रदेश सरकारको १ करोड ३० लाख रुपियाको लागतमा सो योजना सम्पन्न गरिएको हो । प्रदेशको भौतिक पूर्वाधार विकास मन्त्रालयअन्तरगत खानेपानी डिभिजन कार्यालय भक्तपुरले ट्याङ्की र फिल्टर निर्माण गरेको र शुद्धीकरण गरिएको पानी वडाका करिब ८०० घरलाई वितरण गरिने आयोजनाले जनाएको छ ।
नवनिर्मित ट्याङ्की र फिल्टरको आज उद्घाटन गर्दै वाग्मती प्रदेशका भौतिक पूर्वाधार विकासमन्त्री रामेश्वर फुयाँलले प्रदेशभर एक घर एक धाराको नीति अनुसार काम भइरहेको बताए ।
पानीका स्रोत संरक्षण गरी प्रदेशसभाका ६६ वटै निर्वाचन क्षेत्रमा गुणस्तरीय पानी उपलब्ध गराउनका लागि तालतलैया, ढुङ्गेधारा र राजकुलोको संरक्षण गरिने मन्त्री फुयाँलले बताए।
