२ माघ, विराटनगर ।
नेपाल–भारत परराष्ट्रमन्त्रीस्तरीय संयुक्त आयोगको बैठक भारतको नयाँदिल्लीमा आजबाट सुरु हुँदै छ ।
बैठक हैदरावाद हाउसमा बिहान ११ः३० बजे सुरु हुने बताइएको छ । बैठकको अध्यक्षता परराष्ट्रमन्त्री प्रदीप ज्ञवाली र उनका भारतीय समकक्षी एस जयशंकरले संयुक्त रुपमा गर्ने छन् ।
सीमा विवाद लगायत कारणले चिसिएको नेपाल भारतको सम्बन्ध सुधारका लागि पहल सुरु भएको भनिएका बेला मन्त्रीस्तरीय संयुक्त आयोगको एजेण्डाबारे दुई पक्षबीच मतभेद देखा परेको छ।
भारतीय पक्षसँग वार्ताका क्रममा सीमा विवादबारे पनि छलफल हुने दाबीसहित परराष्ट्रमन्त्री प्रदीप ज्ञवालीको टोली बिहीबार भारतको राजधानी नयाँदिल्ली पुगेको थियो। तर बिहीबार नै भारतीय विदेश मन्त्रालयले सीमा विवाद आयोगको एजेण्डामा नपर्ने विज्ञप्तिबाट स्पष्ट पारेको थियो।
उसले सीमा विवादलाई सचिवस्तरीय संयन्त्र र बाउन्ड्री वर्किङ ग्रुपले आफ्नो काम पूरा गरेपछि मात्रै यो आयोगको बैठकमा छलफल हुनुपर्ने अडान राखेको थियो। भारतीय विदेशमन्त्रलायका प्रवक्ता अनुराग श्रीवास्तवले आयोग र सीमा विवाद फरक विषय भएको बताएका थिए।
यद्यपि सीमा विवादबारे प्रश्न उठाउने पक्षमा नेपाली टोली अहिले पनि दृढ रहेको नयाँदिल्लीमा रहेका नेपाली टोलीका एक अधिकारीले बताए। उनले भने, भारतीय विदेश मन्त्रालय के कस्तो विज्ञप्ति निकाल्यो त्यसमा म टिप्पणी गर्न चाहन्नँ।
तर हामीले हाम्रो सीमा विवादको एजेण्डालाई बैठकमा प्रवेश गराउँछौँ। त्यो हाम्रो योजना हो।’ यसअघि प्रधानमन्त्री केपी शर्मा ओलीले राष्ट्रियसभालाई सम्बोधन गर्दै परराष्ट्रमन्त्रीले भारत भ्रमणका बेला सीमा विवादबारे कुरा उठाउने जानकारी गराएका थिए।
सीमा विवादसंगै बैठकमा नेपाल–भारत द्विपक्षीय सम्बन्धका व्यापार, ऊर्जा, पारवहन, कोभिड–१९ सहकार्य, पूर्वाधार, कनेक्टिभिटी, लगानी, कृषि, पर्यटन लगायतका विषयमा छलफल हुने बताइएको छ ।
नेपाल–भारत परराष्ट्रमन्त्रीस्तरीय संयुक्त आयोगको बैठकमा सहभागी भएर मन्त्री ज्ञवाली शनिबार स्वदेश फर्किने कार्यक्रम छ । भारतमा रहँदा उनले उच्चस्तरीय राजनीतिक भेटवार्तासमेत गर्ने चर्चा चले पनि त्यसबारे अहिलेसम्म केही सार्वजनिक गरिएको छैन ।
