९ माघ, काठमाडौं ।
प्रधानमन्त्री केपी शर्मा ओलीले मुलुकमा ननभेज आन्दोलनको उद्घोष भएकाले सजग भएर सामाना गर्न सुरक्षा निकायलाई निर्देशन दिएका छन् ।
सशस्त्र प्रहरी बलको स्थापना दिवस कार्यक्रममा सम्बोधन गर्दै प्रधानमन्त्री ओलीले लोकतान्त्रिक प्रणाली विरुद्ध ननभेज आन्दोलनको घोषणा भएकाले सजग भएर सामना गर्नुपर्ने बताएका हुन्।
नेकपा प्रचण्ड–माधव समूहका अध्यक्ष पुष्पकमल दाहालको अभिव्यक्तिलाई लक्षित गर्दै उनले भने, लोकतान्त्रिक प्रणालीविरुद्ध ननभेज आन्दोलन घोषणा भएको छ ।
के हो यो ननभेज आन्दोलन भनेको ? शाब्दिक हिसाबले यसमा रफु भरिन सक्छ तर मनसाय फुत्किसकेको छ । सजग भएर सशस्त्र प्रहरी बलले यसको सामाना गर्नुपर्छ,’ ओलीले भने ।
उनले दुई चरणमा निर्वाचन हुने समेत दाबी गरेका छन्। प्रदेश २, गण्डकी प्रदेश र लुम्बिनि प्रदेश र सुदुरपश्चिम प्रदेशमा पहिलो चरणमा निर्वाचन गर्ने र प्रदेश १, बागमती र कर्णाली प्रदेशमा दोस्रो चरणमा निर्वाचन गर्ने तयारी भइरहेको उनको भनाइ छ ।
त्यसका लागि तयार हुने उनले सशस्त्र प्रहरी बललाई निर्देशन दिएका छन्। ‘औपचारिक निष्कर्ष त निस्किएको छैन तर दुई चरणमा हामी चुनाव गर्ने तयारीमा छौँ,’ प्रधानमन्त्री ओलीले भने ।
शान्तिपूर्व ढंगले निर्वाचन गराउनका लागि सशस्त्र प्रहरीको भूमिका अहंम रहने उनको भनाइ थियो ।
