१६ माघ, विराटनगर ।
संविधानको रक्षा गर्नु पनि शहीदहरुप्रतिको सम्मान भएको उपराष्ट्रपति नन्दबहादुर पुनले बताएका छन् ।
शहीद दिवसको अवसरमा सन्देश दिँदै उपराष्ट्रपति पुनले शहीद दिवसले संविधानको रक्षा र पूर्ण पालन गर्न सबै नेपालीलाई प्रेरणा दिने उविश्वास व्यक्त गरेका छन् ।
तर संविधान कार्यान्वयनको चरणमै प्रश्न उठेकोमा उनले दुःख व्यक्त गरेका छन् । ‘प्रतिनिधिसभा विघटनपछि संविधानको संरक्षण र पालन हुनुपर्नेमा त्यसो हुन नसकेको भनी प्रश्न उठ्दै र आवाज बढ्दै गएको छ ।
नयाँ संविधान कार्यान्वयनको प्रारम्भिक चरणमै यसरी प्रश्न उठ्नुपर्ने अवस्था सिर्जना हुनु ज्यादै दुःखद कुरा हो,’ उपराष्ट्रपति पुनको सन्देशमा लेखिएको छ ।
उनले शहीदहरुको बलिदानीबाट प्राप्त गणतन्त्र, संघीयता, धर्मनिरपेक्षता, सामाजिक न्यायसहितको समानुपातिक समावेशी शासन व्यवस्था जस्ता उपलब्धीहरुलाई संस्थागत गरेको संविधानको रक्षा र पूर्ण पालन गर्नु हामी सबैको दायित्व भएको बताएका छन् ।
