१७ माघ, मनाङ । आगलागीका कारण मनाङको नासो गाउँपालिका तीन वडाका बस्ती जोखिममा परेका छन् । वडा नम्बर ६ बाट लागेको आगो अहिले सात र आठ नम्बर वडामा फैलिरहेको गाउँपालिकाका अध्यक्ष चन्द्र घलेले जानकारी दिए ।
उनकाअनुसार गाउँको भन्दा तल पाखो रहेकाले आगो नियन्त्रणमा लिन नसके बस्तीमा फैलिने डर छ । आगो निभ्याउन नेपाली सेना, सशस्त्र प्रहरी र स्थानीयबासिन्दाले प्रयास गरिरहेका छन्।
स्याउला र धारोको पानी पाइपमा जोडेर आगो निभाउने प्रयास भइरहेको छ । तर, हावाहुरी चलिरहेकाले आगो झनझन् फैलिरहेको नासो गाउँपालिकाका अध्यक्ष चन्द्र घलेले जानकारी दिए । गएको मङ्सिर ११ गतेदेखि लागेको आगो निभ्न नपाउँदै नासो गाउँपालिकाका जङ्गलमा आगो लागेको हो ।
मनाङको ताचैमा लागेको आगो दुई दिनदेखि लगातार प्रयास गर्दा पनि नियन्त्रणमा आउन सकेको छैन । रातदिन नभनी भोकभोकै यहाँका स्थानीय आगो निभाउन खटिइरहेका छन् । चारैतिर अग्ला डाँडाकाँडा र बीचमा रहेको बस्ती ताचै हो । त्यहाँ ६३ घरधुरी छन् ।
ताचै संरक्षण क्षेत्र व्यवस्थापन समिति अध्यक्ष याद घलेले आगो निभाउने प्रयास भइरहेको बताए । अर्का स्थानीय रोशन गुरुङले आगो नियन्त्रणमा अन्नपूर्ण संरक्षण क्षेत्र (एक्याप) ले चासो नदिएको गुनासो गरे ।
आगोले एक्याप क्षेत्रको दुई हजार हेक्टर जङ्गल सखाप पारेको छ । अहिले आगो मनास्लु पदमार्गतर्फ गोवा भन्ने ठाउँमा बलिरहेकोे वडा ७ तिल्चेका अध्यक्ष धनबहादुर गुरुङले जानकारी दिए । (रासस)
