२१ माघ, मकवानपुर ।
पूर्व पश्चिम रेल मार्ग अन्तरगत मकवानपुर जिल्लामा पर्ने खोला तथा निकुञ्ज क्षेत्रमा सर्वेक्षणको काम भइरहेको छ । मकवानपुरको चुरीयामाईदेखि लोथरसम्म निर्माण हुने करिब ४० किलो मिटर लामो रेल्वे ट्र्याक अन्तरगत मकवानपुरको खोला क्षेत्रमा डिपिआर सर्वेक्षणको काम भइरहेको हो ।
चितवनको गैँडाकोटबाट सुरु गरेर सर्वे टोलीले अहिले मकवानपुरको मनहरी गाउँपालिका स्थित खोला क्षेत्रमा सर्वेक्षणको काम गरिरहेको छ । सर्वेक्षणको जिम्मा पाएको एमबीसी कन्सल्टेन्सी प्रालीका साइड इन्जिनियर अनिल केसीका अनुसार निजगढ–गैँडाकोट खण्डको डिपिआर सर्वेक्षण अन्तिम चरणमा पुगेको छ ।
रेल मार्ग अन्तरगत निजगढ–गैँडाकोट खण्डको १३६ किलो मिटर क्षेत्रमध्ये नदी र निकुञ्ज क्षेत्रको ५ देखि ७ किलोमिटर क्षेत्र बाहेकको डिपिआर सर्वेक्षणको काम सम्पन्न भएको उनले जानकारी दिए ।
अन्य क्षेत्रको डिपिआर सम्पन्न गरेर अहिले खोला क्षेत्रमा डिपिआर भइरहेको बताउँदै उनले निकुञ्ज क्षेत्रमा सर्वेका लागि पत्राचार भएको र निकुञ्ज विभागबाट पत्र प्राप्त भएपछि सो क्षेत्रमा पनि सर्वेको काम सुरु हुने बताए । डिपिआर सर्वेक्षणका लागि १२ जनाको टोलीले काम गरिरहेको उनले जानकारी दिए ।
इन्जिनियर केसीका अनुसार निजगढ–गैँडाकोट खण्डमध्ये मकवानपुरको चुरीयामाई–हेटौँडा उपमहानगरपालिकाको वडा नम्बर ९ र १४ को सिमाना, हेटौँडा सिमेन्टको पछाडिको क्षेत्र कुखरेनी खोलाको पश्चिमी किनार, वडा नम्बर १२ स्थित रापती खोलाको दक्षिणी क्षेत्र हुँदै मनहरी गाउँपालिकाको रजैया हुँदै लोथरसम्म पुग्ने बताए । चुरीयामाई देखि मकवानपुर क्षेत्र पर्ने र सो को लम्बाई ४० किलो मिटर रहेको उनले बताए ।
करिब एक हजार किलोमिटरको पूर्व–पश्चिम रेलमार्गअन्तर्गत मेचीदेखि बुटवलसम्मको ५ सय ३९ किलोमिटरको डिपिआर तयार भइसकेको छ । भने, बर्दिबास–सिमरा रेलमार्ग अढाइ वर्षभित्र सञ्चालनमा ल्याउने र बर्दिबासदेखि लाल बन्दीसम्मको निर्माण कार्य समेत सुरु भइसकेको छ ।
तर, सिमरा–तन्सरिया खण्डमा चितवन राष्ट्रिय निकुञ्ज पर्ने हुनाले त्यसको विकल्प स्वरूप निजगढ–हेटौँडा–भरतपुर–तन्सरिया रुटको विकल्प अध्ययन भइरहेको हो । यसअघि पूर्व–पश्चिम रेलमार्गको कुल लम्बाइ ९ सय ४५ किलोमिटर अनुमान गरिएकोमा रुट परिवर्तन हुनाले लम्बाई एक हजार किलोमिटर हुने भएको हो ।
