२२ माघ, काठमाडौँ ।
प्रधानमन्त्री केपी शर्मा ओलीले पुष्पकमल दाहाललाई अनावश्यक रुपमा हप्की दप्की नगर्न र कानूनको पालना गर्न सुझाव दिएका छन् । प्रचण्ड माधव समूह आक्रामक ढंगले अघि बढेको तथा नियम तोड्ने धाकधक्कु लगाउने र कानून मान्दिन भन्दै प्रहरी प्रशासन तथा निर्वाचन आयोगलाई धम्की दिदै हिडेको उल्लेख गर्दै उनले अब ‘कानून मान्दिनँ’भन्ने जमाना नभएको बताए ।
विहिबार काठमाण्डौमा आयोजित अखिल नेपाल किसान महासंघको राष्ट्रिय कार्यकर्ता भेलालाई सम्बोधन गर्दै उनले भने “कानूनको पालना गर्नुहोस् हप्की दप्की गर्ने होइन । पालना गर्न सिक्नुहोस् कानुनको । लोकतन्त्र भनेको कानूनको राज हो । बलमिच्याईँको राज होइन । प्रचण्डलाई म सम्झाउन चाहन्छु । ती दिन गए जतिबेला तपाई संविधान मान्दिनँ, कानून मान्दिनँ भनेर उपद्रोप मच्चाएर हिड्नुभएको थियो । त्यो जामाना गयो । अब कानूनको पालना गर्नुहोस् । अदालतलाई, निर्वाचन आयोगलाई धम्क्याएको छ । हामी यहाँ छौ भनेर ।”
आमहड्ताल आव्हान गरेर प्रचण्ड माधव समूहले जनतालाई दुख दिएको र आफुहरु चाँही गाडी र मोटरसाईकलबाट जनताले पाएको दुखको तमासा हेर्दै हिडेको बताए । उनले कार्यकर्ता नभएर नेताहरु आफै सडकमा उत्रिएको भन्दै व्यंग्य गरे । उनले भने “बाटाका छेउमा ल्याएर बेचिराखेको तरकारी सडकभरी फ्याकेर क्रान्तिकारीता देखाउनुभयो । अरुका गाडी जलाउनु भो आफु गाडी सयर भएर तमासा हेर्दै जनताले कति दुख पाएका छन् हँ भनेर ? गाडी चढेर तमासा हेर्दै हिड्नुभयो । अर्को गाडी चढ्न अलि भएन, आफैले बन्द गर्या गाडी नै त नचढुँ भनेर बाईक सम्म त हुन्छ भने र बाईक लिएर हिड्र्दै जनताले कति दुःख पाए भनेर रमिता हेर्दै हिड्नु भो । कार्यकर्ता सिद्धिएछन् कार्यकर्ता यता छन् कहाँ बाट होस् त उता । कार्यकर्ता सिद्धिएछन् अनि आफै हामी यहाँ छौ भन्ने एउटा टास्यो । अनि गाडी रोक भनेर को उभिएको छ भनेर हेरेको त प्रचण्ड उभिईराखेको । उभिएको कस्तो ठाउँमा फेरी सातदोबाटोमा । साईनबोर्ड लिएर । कार्यकर्ता छैनन् सिद्धिएछन् । आफै उत्रनुभयो । ”
