२२ माघ, विराटनगर।
नेकपाको प्रचण्ड– माधव समूहले आह्वान गरेको आमहड्तालको विरुद्धमा विराटनगरमा प्रतिकार र्याली निकालिएको छ । बन्द सँधैका लागि बन्द गर्नुपर्ने भन्दै विराटनगरका स्थानीय नेता, विद्यार्थी, व्यवसायी तथा आम सर्वसाधारणले आमहड्तालको प्रतिकार गरेका हुन् ।
कसैको स्वार्थका लागि गरिएको बन्द अब सर्वसाधारणले सहन नसक्ने उनीहरुको भनाई छ । लोकतन्त्रमा विरोध गर्न पाइने भएपनि बन्दको विकल्प खोज्नुपर्ने उनीहरुको माग छ । कोभिडका कारण भर्खरै खुल्न थालेका व्यापार– व्यावसाय, विद्यालय क्षेत्रहरु कसैको स्वार्थका लागि फेरि बन्द गर्दा आम सर्वसाधारणमा नैराश्यता उत्पन्न भएको विद्यार्थी नेता भाष्कर खनालले बताए । प्रदर्शनमा सहभागीले बन्द सँधैका लागि बन्द गरौँ, नेपाल खुल्ला छ, गरिखान देऊ लगायतका नारा लगाएका थिए ।
प्रदर्शनमा मेहन्द्र मोरङ क्याम्पस, स्नात्तकोत्तर क्याम्पस, पूर्वाञ्चल विश्वविद्यालयका विद्यार्थीहरुको बाहुल्यता थियो । बिहीबार नेकपा प्रचण्ड–नेपाल समूहले गरेको आमहड्तालका कारण देशभरको जनजीवन प्रभावित भएको छ । बन्दकर्ताहरुले बन्दका क्रममा विराटनगरमा तीन वटा सवारी साधनमा तोडफोड गरेका छन् । यस्तै शनिहाटस्थित एक चियापसलमा समेत तोडफोड गरेका छन् । तोडफोडमा संलग्न ६ जनालाई पक्राउ गरिएको प्रहरीले जनाएको छ ।
