६ फागुन, एजेन्सी ।
दक्षिण अफ्रिकाका तीव्र गतिका बलिङ अलराउन्डर क्रिस मोरिस इन्डियन प्रिमियर लिग (आइपिएल)को सर्वाधिक महंगा खेलाडी भएका छन् । १४ औं संस्करणको आईपीएलका लागि चेन्नईमा अहिले भइरहेको अक्सनमा मोरिसलाई राजस्थान रोयलल्सले १६ करोड २५ लाखमा अनुबन्ध गरेको हो ।
जुन आइपिएल अक्सनमा कुनैपनि खेलाडीले पाएको सर्वाधिक मूल्य हो । यसअघि आइपिएल अक्सनमा सर्वाधिक महँगो मूल्य सन् २०१५ मा भारतीय आक्रामक ब्याट्सम्यान युवराज सिंहलाई दिल्ली क्यापिटल्स (तत्कालिन दिल्ली डेयरडेभिल्स) ले १६ करोड भारुमा किनेको थियो । मोरिसलाई रोयल च्यालेन्जर्स बेंगलोरले फुकुवा गरेको थियो ।
गतवर्ष मोरिसलाई बेंगलोरले १० करोडमा किनेको थियो । मोरिसलाई किन्न अक्सनमा पन्जाब, राजस्थान, मुम्बई र बेंगलोरबीच उच्च प्रतिस्पर्धा भएको थियो । मोरिसले न्यूनतम मूल्य ७५ लाख मात्र तोकेका थिए । आइपिएल इतिहासमा पहिलो पटक १६ करोडमाथि अक्सनमा बोली लागेको हो ।
