१२ फागुन, विराटनगर । विराटनगरका पत्रकार हरिहर नेपाललाई जंगवीर गुभाजु श्रेष्ठ प्रतिष्ठान झापाले यस वर्षको पत्रकारिता पुरस्कार प्रदान गर्ने निर्णय गरेको छ ।
प्रतिष्ठानको बुधबार बसेको बैठकले डेढ दशकदेखि पत्रकारितामा सक्रिय नेपाललाई नगद ११ हजार १ सय ११ रुपैयाँ राशिको पुरस्कार समर्पण गर्ने निर्णय गरेको हो ।
स्काई एफएम, उज्यालो ९० नेटवर्क, नेपाल वान टेलिभिजन, नेपाल समाचारपत्रमा काम गरिसकेका पत्रकार नेपाल हाल विराटनगरस्थित मकालु टेलिभिजनमा सहायक सम्पादकका रुपमा कार्यरत छन् ।
त्यस्तै इटहरीकी साहित्यकार रीता ताम्राकारलाई प्रतिष्ठानले यस वर्षको साहित्य पुरस्कार प्रदान गर्ने निर्णय गरेको अध्यक्ष बाबुराम श्रेष्ठ ‘वर्षा’ले जानकारी दिए । ताम्राकार विगत दुई दशकभन्दा लामो समयदेखि साहित्य सिर्जनामा सक्रिय छन् ।
ताम्राकारलाई पनि नगद ११ हजार १ सय ११ रुपैयाँ र सम्मानपत्रका साथ पुरस्कृत गरिनेछ । घोषित सबै पुरस्कार यही फागुन १९ गते झापाको बुट्टाबारीमा विशेष समारोहको आयोजना गरेर समर्पण गरिने प्रतिष्ठानले जनाएको छ ।
