२५ फागुन, काठमाडौँ । कर्णाली नदीमा हराइरहेका भनिएका सुकी बडुवाल र उनका एक छोरा र छोरीको खोजीका लागि गोताखोरको सहयोग लिइने भएको छ ।
हिजो बेलुका कर्णाली नदी किनारमा सुकीका १५ र १२ वर्षकी छोरी कल्पना र सरिताको शव भेटिएको थियो । तर, सुकीसहित उनका ८ वर्षका छोरा ललित र ५ वर्षकी छोरी रजनीको अवस्था अझै अज्ञात छ ।
आमा सुकीसहित पाँचै जनाले कर्णाली नदीमा हामफालेको आशंकामा प्रहरीले खोजी अभियानलाई निरन्तरता दिएको छ । अहिले स्थानीयबासिन्दाको सहयोगमा नेपाल प्रहरी र सशस्त्र प्रहरीले डुंगामार्फत् खोजी गरिरहेको जिल्ला प्रहरी कार्यालय दैलेख डीएसपी अनुपम श्रेष्ठले जानकारी दिए ।
उनीहरुको खोजीका लागि गोताखोर र पौडीबाजलाई बोलाउने तयारी गरिएको पनि डीएसपी श्रेष्ठले जानकारी दिए । हिजो बेलुका हात बाँधिएको अवस्थामा कल्पना र सरिताको शव भेटिएको थियो । प्रहरीकाअनुसार श्रीमान मानसिंह बडुवालसित झगडा परेपछि दैलेखको आठबीस नगरपालिका–३ की सुकी चार जना छोराछोरीलाई साथमा लिएर घरबाट निस्किएका थिए ।
आठबीस नगरपालिका–३ का वडाअध्यक्ष प्रयागबहादुर शाहीले आमाले चार जना छोराछोरीलाई लिएर कर्णालीमा हामफालेको आशंका गरिएको बताएका छन् । दैलेख र अछामको बीचमा पर्ने पुलमा पाँच जोर चप्पल भेटिएकाले पनि पाँचै जना कर्णालीमा हामफालेका आशंका गरिएको उनले बताए ।
प्रहरीले श्रीमान मानसिंहसँग सोधपुछ गरिरहेको छ । कामका लागि भारत गएका मानसिंह गएको मङ्सिर महिनामा मात्रै घर फर्किएका थिए ।
