काठमाडौं : बाली लगाउने बेलामा चरम अभाव भएको रासायनिक मल पाक्ने बोमा भने भित्रिएको छ ।
गहुँ छर्ने र गोड्ने बेलामा अभाव रहेको मल अहिले बल्ल पाक्ने बेलामा नेपाल आइपुगेको हो ।
हिउँदे बालीलई लक्षित गरेर सरकारले मल ल्याउनुपर्ने थियो । तर अब धानलगायत बर्खे बालीको लागि उपयोग हुने भएको छ ।
कृषि सामग्री लिमिटेडका अनुसार बंगलादेशबाट ल्याउन लागिएको ५० हजार टन रासायनिक मलमध्ये पहिलो चरणमा मंगलबार २५ सय ४० टन वीरगञ्जमा आइपुगेको छ ।
बंगलादेशबाट जिटुजीमार्फत ल्याउन सम्झौता भएअनुसार पहिलो चरणको २२ हजार टनमध्ये २५ सय ४० टन आइपुगेको हो ।
लिमिटेडका प्रवक्ता विष्णु पोखरेलले बाँकी मल १५ दिनभित्रमा आइपुग्ने बताए ।
कम्पनीसँग अहिले पर्याप्त मात्रामा मल रहेकाले अभाव नहुने उनको दाबी छ र धान रोप्ने बेला बजारमा मलको हाहाकार भएपछि मन्त्रालयले साउन भदौमै नेपाल आइपुग्ने गरी आपतकालीन अवस्थामा पैचोमा मल ल्याउन खाजेको थियो ।
तर, सिजनमा ल्याउन सकेन । ६ महिनापछि मल आयात भएको हो । कारोबार दैनिकमा खबर छापिएकाे छ ।
