२ चैत्र, एजेन्सी ।
नेदरल्याण्डसले अक्सफोर्ड–एस्ट्राजेनेकाको कोरोना भाइरसविरुद्धको खोप लगाउन तत्कालका लागि बन्द गरेको छ ।
सम्भावित ‘साइड इफेक्ट’ लाई मध्यनजर गरि यस्तो निर्णय गरिएको डच सरकारले बताएको छ । कम्तीमा मार्च २९ सम्मका लागि अक्सफोर्ड–एस्ट्राजेनेकाको खोप लगाउन बन्द गरिएको छ ।
नर्वेमा खोप लगाएका वयस्कमा ब्लड कल्ट बनेको भन्ने खबर आएपछि यसअघि रिपब्लिक अफ आयरल्याण्डले पनि अक्सफोर्ड–एस्ट्राजेनेकाको खोपको प्रयोग तत्कालका लागि बन्द गरेको थियो ।
तर विश्व स्वास्थ्य संगठन (डब्लुएचओ) ले भने सो खोप र ब्लड कल्टबिच कुनै सम्बन्ध नरहेको बताएको छ । युरोपियन मेडिसिन एजेन्सी (इएमए) ले खोप र ब्लड कल्ट सम्बन्धमा अहिले अनुसन्धान गरिरहेको छ ।
यसअघि डेनमार्क, नर्वे, बुल्गेरिया, आइसल्याण्ड र थाइल्याण्डले पनि अक्सफोर्ड–एस्ट्राजेनेकाको खोप लगाउन तत्कालका लागि बन्द गरेका थिए ।
डेमार्क र नर्वेबाट आएका खबरलाई मध्यनजर गरि सम्भावित गम्भीर ‘साइड–इफेक्ट’ लाई ध्यानमा राखेर तत्कालका लागि खोपको प्रयोग रोकिएको डच सरकारले जनाएको छ ।
खोपका सम्बन्धमा रहेको शंका दूर भएपछि मात्रै अघि बढ्ने डच स्वास्थ्य मन्त्री हुगो डी जोङ्गेले बताएका छन् । सबै ठीक रहेको भनेर ढुक्क हुनका लागि तत्काल खोपको प्रयोग रोकिएको उनले बताए ।
आइतबार भएको यो निर्णयसँगै नेदरल्याण्डसको खोप अभियान प्रभावित भएको छ ।
