४ चैत, काठमाडौँ । नेपाल आयल निगमले इन्धन तस्करीमा संलग्न भएको अभियोगमा ढुवानीकर्ता र पेट्रोल पम्पलाई कारबाही गर्ने भएको छ।
भारततर्फ तस्करी हुन लागेको ठूलो परिमाणको इन्धन बरामद भएपछि निगमले ढुवानीकर्ता र पेट्रोल पम्पलाई पनि कारबाहीको दायरामा ल्याउने भएको हो।
२९ फागुनमा २ हजार ६ सय ६० लिटर डिजेल ट्याङ्कर बरामद भएपछि निगमले कारबाहीको प्रक्रिया अगाडि बढाएको हो।
निगमले ढुवानीकर्ता र तस्करी गर्न तेल भर्ने पेट्रोल पम्पलाई कारबाहीको लागि प्रक्रिया अगाडि बढाएको नेपाल आयल निगमको प्रदेश नम्बर १ को कार्यालयका प्रमुख नकुल भण्डारीले जानकारी दिए।
को १ ख ५९१२ नम्बरको ट्याङ्कर ढुवानीकर्ता चरणप्रीत सिंहको रहेको खुलेको छ। निगमका कर्मचारीले लक गर्नुभन्दा अगाडि ट्यांकर चेक गर्दा एक च्याम्बरमा डिजल फेला परेको थियो।
कुनै पनि रित्तो ट्यांकरलाई पेट्रोलियम ढुवानी गर्न भारतको बरौनी वा सिलिगुडी पठाउँदा ट्यांकरका चार वटै च्याम्बरको परीक्षण गरेर लक लगाएरमात्र पठाउने गरिन्छ। त्यही ट्यांकर सोही दिन सिलिगुडीबाट २० हजार लिटर पेट्रोल लिएर आएको थियो। त्यसले बेलबारी, विराटचौक र सुनसरीको तरहराको पेट्रोल पम्पहरूमा सो इन्धन अनलोड गरेको थियो।
भारततिर इन्धन तस्करी हुन लागेको डिजेल बरामद भएकोले ढुवानीकर्ता र डिजेल भर्ने पेट्रोल पम्पलाई पनि कारबाहीको दायरामा ल्याउने तयारी गरेको कार्यालय प्रमुख भण्डारीले बताए।
‘अहिले अनुसन्धान राजस्व कार्यालय इटहरीले गर्दैछ। हामीले राजस्वको निर्णाय पर्खिरहका छौं। यस घटनामा निगमले पनि छुट्टै कारबाहीको प्रक्रिया अगाडि बढाउनेछ,’ उनले भने, ‘निगमको विनियम अनुसार बदमासी गर्ने ढुवानीकर्तालाई ३ देखि ६ महिना निलम्बन र आपूर्ति बन्द गर्न सक्नेसम्मको अधिकार छ। त्यही विनियम अनुसार कारबाहीको प्रक्रिया अगाडि बढाइनेछ।’
