१४ चैत्र, एजेन्सी ।
भारतमा विधानसभाको पहिलो चरणको निर्वाचन सुरु भएको छ।
आज पश्चिम बंगलाका पाँच जिल्लाका ३० विधानसभा सिट र असमका १२ जिल्लाका ४७ विधानसभा सिटका लागि मतदान सुरु भएको हो।
दुवै राज्यमा उच्च सुरक्षाबीच मतदान कार्यक्रम सुरु भएको भारतीय सञ्चारमाध्यमहरुले जनाएका छन्।
पहिलो चरणमा असमका माजुली, गोहपुर, जोरहाट, नाजिरालगायतका हाई प्रोफाइल सिटमा मतदान भइरहेको छ।
माजुलीबाट मुख्यमन्त्री सर्वानन्द सोनोवाल तथा जोरहाटबाट असम विधानसभाका अध्यक्ष हितेन्द्रनाथ गोस्वामी चुनावी मैदानमा छन्।
भारतीय निर्वाचन आयोगका अनुसार पहिलो चरणमा असमका २३ महिलासहित २६४ उम्मेवार चुनावी मैदानमा छन्। यस्तै‚ पश्चिम बंगालका केही संवेदनशील क्षेत्रमा आज मतदान हुँदैछ।
जसमा माओवादीको नियन्त्रण रहेको क्षेत्र पनि छ। यो क्षेत्रका लागि भारतीय निर्वाचन आयोगले केन्द्रीय सुरक्षा बलको ७३२ कम्पनी परिचालन गरेको छ।
मतदान स्थानीय समयअनुसार बिहान ७ बजेदेखि साँझ ६ बजेसम्म चल्नेछ। यसैबीच प्रधानमन्त्री नरेन्द्र मोदीले एक ट्विट गर्दै मतदानमा नयाँ रेकर्ड बनाउन आग्रह गरेका छन्।
उनले युवाहरुलाई लक्षित गर्दै असम क्षेत्रमा व्यापक मतदान गर्न आग्रह गरेका छन्। मोदीले ट्विटमा भनेका छन्‚ ‘असममा पहिलो चरणको मतदान सुरु भइसकेको छ, रेकर्ड संख्यामा मदतान गर्न म आग्रह गर्दछु, खासगरी मेरो आग्रह युवाहरुका लागि छ।’
