२८ चैत, काठमाडौं । विश्वलाई फेरि पनि कोरोना भाइरसले आक्रान्त बनाउँन सुरु गरेपछि धेरै राष्ट्र पुन लकडाउनमा गएका छन् ।
यसैलाई आधार मानेर सबैको मनमा अहिले एउटै प्रश्न उठ्छ–के फेरि नेपालमा लकडाउन हुन्छ ? एकै दिन विश्वमा करिब ८ लाख र भारतमा मात्रै डेढ लाख कोरोनाका संक्रमित भेटिँदा नेपाल सरकारले समेत संक्रमण बढ्न नदिनका लागि आवश्यक सतर्कता र तयारी थालेको भनेको त छ तर ति तयारीले मात्रै संक्रमणको चेत ब्रेक होला त ? तर भारतसँगको खुला सिमानामा कडाई नगरुञ्जेल, नागरिकले स्वास्थ्य सुरक्षाका मापदण्ड पालना नगरुञ्जेल र परीक्षणको दायरा बढाएर आइसोलेट नगरुञ्जेल संक्रमणको चेन ब्रेक हुँदैन, जुन यसअघिको अनुभवले समेत बताइसकेको छ । यी सबैको पालना नभए, तीनलाई कडाइका साथ पालना गराउनका लागि लकडाउन नै उपयुक्त विकल्प हो । प्रधानमन्त्री केपी शर्मा ओलीले पनि आवश्यक स्वास्थ्य सुरक्षाका मापदण्ड पालना नगरे सरकारले लकडाउन गर्नसक्ने संकेत गरेका छन् ।
नेपालमा अस्पतालमा सिकिस्त कोरोना संक्रमितको संख्या बढ्न थालेको छ । शुक्रराज ट्रोपिकल तथा सरुवा रोग अस्पतालका प्रमुख कन्सलट्यान्ट डा. अनुप बाँस्तोलाले नेपालमा पनि कोरोनाको दोस्रो अध्याय सुरु भइसकेको बताउँदै पछिल्लो केही दिनमा अस्पतालमा सिकिस्त बिरामीको संख्या बढेको बताए । केही हप्ता यता संक्रमितको मृत्यु नभएपनि सिकिस्त बिरामीको चाप बढ्दै गएमा २–३ हप्ताभित्र मृत्युदर बढ्न सक्ने डा. बाँस्तोलाको भनाइ छ । चरणवद्ध रुपमा सरकारले कोरोनासँग लड्नका लागि यसअघि देखि नै तयारी थालिसकेपनि विद्यालय क्षेत्र कोरोना भाइरसको हटस्पट बन्नसक्नेमा सरकार बढि त्रसित छ । लकडाउन भन्दा अघि सरकारले अन्य विकल्पहरुको खोजी थालेको छ । यस्तै निर्देशन र कार्यान्वयनमा कडाइ नगर्दासम्म सरकारको आग्रहलाई बेवास्ता गर्ने नागरिकको प्रवृत्तीले झनै जोखिमलाई निम्तो दिइरहेको छ । पछिल्ला केहिदिनयता नेपालमा कोरोना भाइरसको संक्रमण दर बढ्न थालेको छ । खासगरी भारतसँग खुला सिमा हुनु र भारतमा दैनिक लाखौं संक्रमित भेटिनु नेपालको लागि चूनौती बनेको छ । चूनौतीलाई सामना गर्न स्वास्थ्य सुरक्षाका मापदण्ड पालना गर्नु पहिलो प्राथमिकता हो, तर त्यसलाई पालना नगरे लकडाउन गर्ने संकेत सरकारले दिइसकेको छ ।
अब लकडाउन हुने र नहुने अथवा लकडाउनमा बस्ने कि नबस्ने भन्ने निर्णयको आधार नागरिकको व्यहार र दैनिक आचरणमा भर पर्नेछ ।
