४ वैशाख, काठमाडौं ।
प्रतिनिधिसभाका सभामुख अग्नि सापकोटाले संसदमा अराजक र अनैतिक भूमिका खेलिरहेको आरोप प्रधानमन्त्री केपी शर्मा ओलीले लगाएका छन्।
बालुवाटारमा भएको सर्वदलीय बैठकमा प्रधानमन्त्री ओलीले सभामुखको भूमिका अराजक र अनैतिक रहेको आरोप लगाएका हुन्।
बैठकमा सहभागी राष्ट्रिय प्रजातन्त्र पार्टीका अध्यक्ष प्रकाशचन्द्र लोहनीका अनुसार प्रधानमन्त्रीले सभामुख सापकोटाको भूमिकाबारे तीव्र असन्तुष्टि पोखेका हुन्।
‘सभामुखको भूमिका अराजक र अनैतिक भयो, प्रधानमन्त्री ज्यूले प्रयोग गरेको शब्द यही हो’ लोहनीले भने, ‘बाँकी कोभिडको समस्या कसरी समाधान गर्ने भन्नेबारे उहाँले राय माग्नुभयो।’
लोहनीका अनुसार सभामुख सापकोटाले सरकारलाई काम गर्न नदिएको गुनासो प्रधानमन्त्रीले गरेका छन्। ‘सभामुखले जे जे काममा सहयोग गर्नुपर्ने थियो त्यो गर्नु भएन।
त्यसमा मलाई दुःख लागेको छ’, प्रधानमन्त्रीले भनेका थिए। बैठकमा प्रधानमन्त्री ओलीले नेताहरुसँग कोरोना नियन्त्रणका उपायहरु माग समेत गरेका थिए।
