१६ बैशाख, काठमाडौं । औषधि व्यवस्था विभागले कोभिड महामारीमा औषधिको अभाव नहुने जानकारी दिएको छ । कोभिड १९ को महामारीले भयानक रुप लिएसँगै अत्यावश्यक औषधि अभाव हुने डर पैदा भएको बेलामा विभागले यस्तो जानकारी दिएको हो ।
औषधि व्यवस्था विभागका सूचना अधिकारी सन्तोष केसीले भने, ‘औषधिको अभाव भएको छैन । अभाव हुन सक्ने सम्भावनालाई मध्यनजर गर्दै पूर्व तयारी गर्दै छौं ।’
भारतमा कोभिड १९ महामारी नियन्त्रण बाहिर गएको अवस्थामा पनि त्यहाँबाट नेपालमा औषधि आयात भइरहेको उनले बताए । ‘भारतको अवस्था विकराल बने पनि औषधि आयातमा कुनै अवरोध छैन ।’–उनले बताए ।
आइसीयुमा रहेको बिरामीका लागि तत्काल प्रयोग हुने रेम्डीसिभीर नामको इन्जेक्सन भने भारतले निर्यातमा रोक लगाएको उनले जानकारी दिए । तर उक्त इन्जेक्सन बङलादेशमा पनि उत्पादन हुने भएकाले बङलादेशबाट ल्याउन अनुमति दिइसकेको समेत उनको भनाई छ ।
कोभिड १९ को महामारीसँगै एन्टिबायोटिक औषधिको प्रयोग बढेको छ । रुघाखोकी, ज्वरो, निमोनिया, दम बढ्ने, प्रसर आदि लक्षणहरु कोभिडको लक्षण भएकाले सिम्टम्याटिक औषधिहरुको खपत बढेको सूचना अधिकारी केसीले बताए ।
औषधिको लागि आवश्यक कच्चा पदार्थ भारत र चीनबाट आयात गर्दै आएको र भारतबाट आयात गर्न नसकिए पनि चीनबाट आयात गर्न सकिने उद्योगीहरुले आफूलाई जानकारी दिएको उनले स्पष्ट पारे । केही महिनाका लागि पुग्ने कच्चा पदार्थ मौज्दात रहेको समेत केसीले जानकारी दिए ।
महामारीलाई नै कन्द्रिीत गरेर सम्बन्धीत पक्षहरुसँग छलफललाई तिब्रता दिएको पनि सूचना अधिकारी केसीले बताए । विभागले स्वास्थ्य मन्त्रालय, स्वास्थ्य कार्यालय, गृह मन्त्रालय लगायतसँग छलफल बढाएको उनको भनाई छ ।
औषधिमा कालोबजारी हुन सक्ने कुरालाई ध्यानमा राखेर अनुगमनलाई व्यापक बनाउने तयारी समेत गरेको केसीले जानकारी दिए ।
