२ असार, काठमाडौं ।
ललितपुर महानगरपालिकाभित्रको बालकुमारी–बल्खु सडकखण्डमा स्मार्ट बत्ती जडानका लागि त्रिपक्षीय सम्झौता भएको छ । बालकुमारी–बल्खु सडक खण्डमा बत्ती जडानका लागि ललितपुर महानगरपालिका, नेपाल विद्युत प्राधिकरण र सडक विभागबिच हिजो त्रिपक्षिय सम्झौता पत्रमा हस्ताक्षर भएको हो ।
स्मार्ट सडक बत्ती जडानका लागि प्रारम्भिक लागत झण्डै १७ करोड ३६ लाख रुपैयाँ रहेकोमा ललितपुर महानगरपालिकाले कुल लागतको ६० प्रतिशत, नेपाल विद्युत प्राधिकरणले ४० प्रतिशत तथा ललितपुर महानगरपालिकाले बेहोर्ने ६० प्रतिशत रकममध्येबाट सडक विभागले ३ करोड रुपैयाँ बेहोर्ने गरी सम्झौतापत्रमा हस्ताक्षर भएको ललितपुर महानगरपालिकाका मेयर चिरिबाबु महर्जनले बताए ।
सडक बत्तीलाई सर्भर रुमबाट नियन्त्रण गरिने र सडक बत्ति बाले वापतको शुल्क ललितपुर महानगरपालिकाले तिर्नेछ । सहरलाई उज्यालो बनाउनुका साथै रातको समयमा हुने दुर्घटनालाई रोक्न सडकमा बत्ती जोड्न लागिएको मेयर महर्जनले बताए ।
रिङरोड बाहिरका बस्तीहरु खोकना, बुङमती, हरिसिद्धी, सुनाकोठी, धापाखेलमा पनि स्मार्ट सडक बत्ती जडान गर्नका लागि टेण्डर प्रकाशित भइसकेको पनि उनले जानकारी दिए ।
