१४ असार, काठमाडौं ।
प्रधानमन्त्री केपी ओलीले माधव नेपाललाई आफूले प्रधानमन्त्रीको प्रस्ताव नगरेको बताएका छन् ।
स्वर्गीय नेता मदन भण्डारीको स्मृतिमा आज काठमाडौंमा आयोजित कार्यक्रममा ओलीले माधवलाई आफूले प्रधानमन्त्री बनाउने कुनै प्रस्ताव नगरेको बताए ।
‘मलाई बहुला कुकुरले टोकेको छ र ? कोही मान्छे नभेटाएर यस्ता मान्छे (माधव नेपाल)लाई प्रधानमन्त्रीको प्रस्ताव केपी ओलीले राख्ला ? कहिले अध्यक्षको, कहिले प्रधानमन्त्रीको प्रस्ताव राख्या छ भन्या छ ।
एक ढंगले भन्ने हो भने यी प्रचण्डका पुच्छर हुन् । जन्तु पूर्वतिर फर्कियो भने पुच्छर पश्चिमतिर हुन्छ, पश्चिमतिर फर्कियो भने पुच्छर पूर्वतिर लाग्छ ।’ ओलीले माधव नेपाल अहिले शेरबहादुर देउवाको कार्यकर्ता बनेको टिप्पणी गरे ।
उनले नेपाली कांग्रेसले ‘प्रचण्डपथ’ अँगालेको आरोपसमेत लगाए । कांग्रेसले अँगालेकै कारण प्रचण्डपथ व्यापक हुँदै गएको ओलीको दाबी छ ।
नेपाली कांग्रेसका नेताहरू नै नाथुराम गोड्से खोजी गर्ने, भेटिएन भने आफैँ नाथुराम गोड्से बन्ने भन्दैछन् । प्रचण्डपथ कांग्रेसले अँगालेको हो । यो त अदालततिर प्रचण्डका कार्यकर्ताको कुरा सुन्दा पनि पुष्टि भइहाल्छ, ओलीले भने ।
