२२ असार , काठमाडौँ ।
जनता समाजवादी पार्टी (जसपा)का दुवै पक्षले निर्वाचन आयोगलाई आफूहरू मिल्न नसक्ने बताएका छन्।
आयोगले मंगलबार विवाद मिलाउन आयोजना गरेको छलफलमा उपेन्द्र यादव पक्ष र महन्थ ठाकुर दुबै पक्षले आआफ्नो दावी कायम राखेर मिल्न नसक्ने बताएका हुन् । दुबै पक्षले आयोगलाई राजनीतिक दल सम्बन्धी कानुन अनुसार आधिकारिता दिन पनि आग्रह गरेका छन् ।
ठाकुर पक्ष केपी शर्मा ओली नेतृत्वको सरकारमा सहभागी भएपछि फुटको संघारमा रहेको जसपाका यादव पक्षले राजनीतिक दल सम्बन्धी ऐन ४३ र ४४ बमोजिम पार्टीको आधिकारिकतामा दाबी गर्दै आयोगमा निवेदन दिएको थियो ।
त्यसपछि आयोगले ठाकुर पक्षलाई १५ दिनभित्र जवाफ दिन भनेको थियो । ठाकुर पक्षले जवाफ दिएपछि आयोगले आपसी सहमति बमोजिम विवाद निरुपण गर्ने प्रयोजनका लागि आज बोलाएको थियो ।
छलफलमा ठाकुर पक्षका ठाकुरसहित राजेन्द्र महतो, लक्ष्मणलाल कर्ण, सरदसिंह भण्डारी र यादव पक्षबाट यादवसहित महेन्द्रराय यादव, राजेन्द्र श्रेष्ठलगायत आयोगको कार्यालय पुगेका थिए ।
अब निर्वाचन आयोगले दल दर्तासम्बन्धी ऐनअनुसार आधिकारिकताका लागि दुबै पक्षलाई दावी पेश गर्न आग्रह गर्ने भएको छ।
