२९ असार, काठमाडौं ।
प्रधानमन्त्रीको शपथ लिने तयारीमा रहेका नेपाली कांग्रेसका सभापति शेरबहादुर देउवाले पार्टीका पदाधिकारी तथा पूर्व पदाधिकारीको बैठक बोलाएका छन्।
बैठक दिउँसो २ बजे देउवा निवास बुढानिलकण्ठमा हुने नेता गोपालमान श्रेष्ठले जानकारी दिएका छन् । बैठकमा सरकार गठन तथा सञ्चालनबारे छलफल हुने उनले बताए।
सर्वोच्च अदालतको आदेश अनुसार देउवाले मंगलबार बेलुका प्रधानमन्त्रीको शपथ लिँदै छन्। उनले सानो आकारको मन्त्रीमण्डल पनि बनाउने तयारी छ। तर कांग्रेसबाट को को मन्त्री बन्ने भन्नेबारे टुंगो लागेको छैन।
देउवा निवासमा हुने बैठकमा यसबारे पनि छलफल हुने जनाइएको छ। अहिलेसम्म प्रकाशमान सिंह, शशांक कोइराला, बिमलेन्द्र निधि, बालकृष्ण खाँडसहितले सरकारमा सहभागी हुने इच्छा व्यक्त गरेको जनाइएको छ।
शशांकले आफू चिकित्सा क्षेत्रबाट आएकाले पनि स्वास्थ्य मन्त्रालय दिए सरकारमा सहभागी हुने बताएको स्रोतले जानकारी दियो। यस्तै खाँडले रक्षा तथा निधिले भौतिक पूर्वाधार मन्त्रालयमा इच्छा व्यक्त गरेका छन्।
तर सरकारको प्रमुख घटकका रुपमा रहने माओवादी केन्द्र तथा बहुमतका लागि सहयोग चाहिने जसपासँगै एमालेको नेता नेपाल पक्षसँग पनि छलफल गरेपछि मात्रै सरकार र मन्त्रालयबारे टुंगो लाग्ने भएकाले मंगलबार सानो आकारको मन्त्री परिषद बन्ने छ।
