८ साउन, चितवन ।
राप्ती नगरपालिका–३ की सुजिता भण्डारीको मृत्युको घटनामा प्रहरीले दाइ नाता पर्ने एकजनालाई पक्राउ गरेको छ । चितवन प्रहरीले शुक्रबार पत्रकार सम्मेलन गर्दै दाइ नेता पर्ने सचिन भन्ने २३ वर्षीय सुकदेव भण्डारीलाई काठमाडौंबाट पक्राउ गरिएको जानकारी दिएको हो ।
चितवन प्रहरी प्रमुख, प्रहरी उपरीक्षक ओमप्रसाद अधिकारीले परिवारले आत्महत्या दुरुत्साहनमा जाहेरी दिएपछि भण्डारीलाई पक्राउ गरिएकोे जानकारी दिए ।
सुजिताले सुकदेवलाई विवाह गर्न दबाब दिएको समेत अनुसन्धानबाट खुलेको छ । तर, आफ्नै काकाको छोरीलाई विवाह गर्न सामाजिक र नैतिक हिसावमा नमिल्ने भन्दै सुकदेवले इन्कार गरेको खुलासा भएको प्रहरीले जनाएको छ । आफूसँग विवाह नगरे आत्महत्या गर्ने भन्दै सुजितो बारम्बार धम्की दिने गरेको पनि प्रहरी अनुसन्धानबाट खुलेको छ । सुजिता र सुकदेवका बुवा दाजुभाइ हुन् ।
त्यसअघि पनि नजिकको नातामा सम्बन्ध अघि नबढाउन परिवारले दुवैलाई जनालाई पटक–पटक आग्रह गरेको कुरा पनि खुल्न आएको छ । परिवारले अस्वीकार गर्ने देखेर विवाह गर्ने र त्यसपछि अपहरणमा परेको नाटक गरी लुकेर बस्ने बारे दुई जनाबीच कुराकानी समेत भएको पनि खुलेको छ ।
शुरुमा परिवारले सुजिताको अपहरण भएको भन्दै प्रहरीमा जानकारी गराएका थिए । असार २० गते ब्रह्मास्थानी सामुदायिक वनको भीरको खोल्सामा सुजिताको शव भेटिएको थियो । सुजिता असार ११ गते बिहानबाट हराएकी थिइन् । शव भेटिएपछि स्थानीयले दोषीलाई पत्ता लगाउनुपर्ने माग गर्दै राजमार्ग अवरुद्ध र प्रदर्शन समेत गरेका थिए ।
