१० साउन, तनहुँ ।
तनहुँका एक वडाले जनप्रतिनिधिहरुका लागि अध्ययन तथा अवलोकन गर्न भन्दै वनियोजन गरेको रकम कोरोनाबाट प्रभावित परिवारलाई सहयोग गर्ने निर्णय गरेको छ ।
शुक्लागण्डकी नगरपालिका वडा–८ ले भ्रमणका लागि छुट्याएको १ लाख ५० हजार र अन्य शिर्षकमा खर्च हुन नसकेको ५० हजार गरी दुई लाख बजेट कोरोनाका कारण प्रभावित भएका परिवारलाई दिने निर्णय गरेको हो ।
वडा–८का वडा अध्यक्ष कृष्णप्रसाद रेग्मीले उक्त रकम वडामा विश्वब्यापी महामारीबाट परिवारका सदस्य गुमाएका परिवालाई प्रति परिवार २० हजारका दरले राहत स्वरुप सहयोग गरिने निर्णय भएको जानकारी दिए । उनले भने “कोरोना कहरले जनतालाई आक्रन्त बनाइरहेको बेला अध्ययन भ्रमणमा जानु उचित ठानेनौँ । थोरै भएपनि राहत हुने भएकाले कोरोनाले सदस्य गुमाएका परिवारको राहतमा खर्चियौँ ।”
दोस्रो लहरले आक्रन्त बनाएको बेला यहाँका जनप्रतिनिधी कोरोना संक्रमितको आत्माबल बढाउन घर–घरै पुग्ने गरेका छन् । जनप्रतिनिधी र स्वास्थ्यकर्मीको टोली पुगेर स्वास्थ्य सामाग्री र पौष्टिक आहार बाँड्ने गरेका छन् । वडा ८ मा १० जनाले कोरोना संक्रमणबाट ज्यान गुमाएका छन् ।
