१० साउन, काठमाडौं ।
अखिल नेपाल फुटबल संघ (एन्फा) का वरिष्ठ उपाध्यक्ष पंकज विक्रम नेम्बाङले राष्ट्रिय फुटबल टोलीका प्रशिक्षक अब्दुलाह अलमुताइरीले आफ्नो कारणले पदबाट राजीनामा दिने घोषणा गरेको सुन्दा आश्चार्य लागेको बताएका छन् । उनले व्यक्तिगत रुपमा अलमुताइरीसँग भेटसम्म नभएको उल्लेख गर्दै खेलका दौरान म्यासेन्जरमार्फत शुभकामना आदान प्रदान मात्र भएको बताएका छन् ।
नेम्बाङले केहि दिन अघि दिएको अन्तवार्ताका विषयमा भने अलमुताइरीको भनाईमा एन्फा महासचिव इन्द्रमान तुलाधरलाई असहमति राखेको स्वीकार गरे । ‘प्रशिक्षकले एउटा अन्तरवार्तामा फुटबल विकासका लागि पदाधिकारीले पनि परिवर्तन हुनुपर्छ भन्नुभएको छ । त्यो उहाँको दायरा भन्दा बाहिरको विषय हो भनेर मै महासचिवलाई कुरा गर्न भनेको थिए,’ उनले भने ।
नेम्बाङले आफ्नो नाम जोडेर राजीनामा दिनुपर्छ भन्ने पूर्वाग्राह हो भन्दै एन्फा अध्यक्ष कर्मा छिरिङ शेर्पालाई विषयको सत्यतथ्य पत्ता लगाउन छानबिन समिति बनाउने माग गर्ने बताएका छन् । नेम्बाङले भने ‘म दोषी देखिएँ भने फुटबल संघबाट राजीनामा दिन तयार छु’ उनले भने, ‘अरु दोषी देखिए भागिदार हुनुपर्छ ।’
अलमुताइरीले आइतबार पछिल्लो ३ सातादेखि एन्फाका वरिष्ठ उपाध्यक्ष नेम्बाङले समस्या उत्पन्न गराएको भन्दै राजीनामा दिन लागेको सामाजिक सञ्जालमार्फत बताएका थिए । उनले कतार फुटबल संघको सहयोगमा गत चैतमा राष्ट्रिय टोलीको प्रशिक्षक पद सम्हालेका थिए । उनको नेतृत्वमा नेपालले इराकविरुद्ध मैत्रीपूर्ण खेल तथा विश्व कप र एसिया कपका ३ गरि ४ खेल खेलेको थियो ।
एन्फाले उनको सम्झौता अवधि थप्नका लागि कतार फुटबल संघलाई पत्रचार गरिरहेकै अवस्थामा अलमुताइरीले राजीनाको घोषणा गरेका छन् । दुई दिन अघि मात्र प्रशिक्षकको सम्झौता थप्ने विषयमा आफूलाई जानकारी नभएको भन्दै नेम्बाङ समुहका एन्फा उपाध्यक्ष समेत रहेका कृष्णबहादुर थापाले टेक्निकल कमिटीबाट राजीनामा दिएका थिए ।
