११ साउन, काठमाडौं ।
काठमाडौंबाट उडेका बुद्ध एयरका २ जहाज त्रिभुवन विमानस्थलमा आकस्मिक अवतरण गरेका छन् । काठमाडौंबाट धनगढीका लागि उडेको बुद्धको ९एन–एएमडी जहाज र नेपालगन्ज उडेको जहाज आकस्मिक अवतरण गराइएको हो ।
बुद्धको ९एन–एएमडी जहाज साँझ ६ बजे विमानस्थलमा अवतरण गरेको छ । बुद्ध एयर स्रोतका अनुसार जहाजमा ‘प्राविधिक गडबडी’ आएको पत्ता लागेपछि चालक दलका सदस्यले जहाज तत्काल विमानस्थल फर्काउने निर्णय लिएका थिए ।
त्यसपछि जहाज विमानस्थलमा सुरक्षित अवतरण गराइएको छ । आपतकालीन अवतरण गर्न लाग्दा फायर भेहिकल तथा एम्बुलेन्सहरु समेत हाइ अलर्ट अवस्थामा राखिएको थियो । जहाजमा ६९ जना यात्रु सवार थिए । उनीहरुलाई आजै अर्को जहाजबाट धनगढी पठाइने जनाइएको छ ।
साथै साँझ ७ बजे काठमाडौंबाट नेपालगन्ज उडेको जहाजमा एक यात्रु बेहोस भएपछि पाइलटले जहाज काठमाडौं नै फिर्ता गरेका हुन् । सो जहाज उनलाई काठमाडौं झारेर पुनः नेपालगन्ज उड्ने जनाइएको छ ।
