१२ साउन, काठमाडौँ ।
एमाले नेता लालबाबु पण्डितले यतिबेला प्रधानमन्त्री शेरबहादुर देउवाको नियुक्तिको प्रक्रियाबारे चौतर्फी रूपमा चर्चा भइरहेको बताएका छन् । प्रतिनिधिसभाको मंगलबारको बैठकमा बोल्दै उनले देउवाको नियुक्तिबारे नेपालीका घरघरमा छलफल भइरहेको बताएका हुन् ।
सांसद पण्डितले भने, ‘संसदीय प्रणालीभित्र सर्वोच्च अदाललतको निर्णयबाट दलीय व्यवस्था त्यागेर निर्दलीय प्रधानमन्त्री बन्नुभएको छ । जुन बाटोबाट प्रधानमन्त्री बन्नुभएको छ त्यो हरेक घरमा, राजनीतिक दलमा छलफलको विषय बनेको छ ।’
संसद् बैठकमा कार्यपालिका, न्यायपालिका र व्यवस्थापिकाले गरेका निर्णयमाथि छलफल हुनुपर्ने सांसद् पण्डितको भनाइ थियो । उनले निर्दलीय बाटोतिर अग्रसर भएमा राजनीतिक दलहरुको अपमान हुने बताए । देउवा सरकारले जनताको पक्षमा र हितमा काम गर्छ कि गर्दैन भन्ने प्रतिपक्षी दलले गम्भीर भएर हेर्ने पण्डितको भनाइ थियो ।
पण्डितले नागरिकता विधेयक छिटो पारित गर्न आग्रह गरेका छन् । प्रतिनिधिसभाको मंगलबारको बैठकमा उनले भने, ‘नागरिकता विधेयक छिटो पारित होस् । नेपाली नागरिकले छिटो नागरिकता प्राप्त गरुन् । निजामति विधेयक पनि छिटो पारित होस् ।’
उनले अपराधीहरू बालुवाटार नपुगुन् भनेर सचेत समेत बनाए ।
