१८ साउन, काठमाडौं ।
चौथो संस्करणको एभरेष्ट प्रिमिय लिग (इपिएल)मा नेपाली क्रिकेट टोलीका स्पिनर सन्दीप लामिछानेले काठमाडौं किंग्स–११ को कप्तानी गर्ने भएका छन् । काठमाडौंले सोमबार सन्दीपले कप्तानी गर्ने औपचारिक जनाएको हो ।
सन्दीपको २१ औं जन्मदिनको अवसरमा काठमाडौंले कप्तानमा नियुक्त गर्दै सार्वजनिक गरेको छ । सन्दीपसँगै काठमाडौंमा कप्तानीको दाबेदारमा नेपाली क्रिकेट टोलीका उपकप्तान दीपेन्द्रसिंह ऐरी पनि रहेका थिए ।
सन्दीपले २०१८ मा ललितपुरबाट सुरुवाती २ खेल खेलेका थिए । त्यसपछि बिग ब्यास लिगका कारण दुई खेलपछि अष्ट्रेलिया लागेका थिए । त्यसपछि सन्दीपले नेपाली फ्रेन्चाइज लिग खेलेका छैनन् ।
फागुनमा भएको काठमाडौं मेयर कपमा सन्दीपले काठमाडौं मेयर–११ को कप्तानी गरेका थिए । सन्दीपले फ्रेन्चाइज लिगमा दोस्रो पटक कप्तानी गर्न लागेका हुन् । सन्दीपले यसअघि २०१८ मा पहिलो संस्करणको पोखरा प्रिमियर लिग –पिपिएल) मा विराटनगर टाइटन्सको कप्तानी गरेका थिए । सन्दीपले नेपाली यू१९ को पनि कप्तानी गरि सकेका छन् ।
काठमाडौं किंग्स–११ ले विदेशी खेलाडीको रुपमा पाकिस्तानका पूर्व स्टार अलराउन्डर शाहिद अफ्रिदीलाई विदेशी खेलाडीको रुपमा सार्वजनिक गरि सकेको छ । काठमाडौंमा सन्दीप लामिछाने, दीपेन्द्र सिंह ऐरी, जितेन्द्र कुमार मुखिया, अमित श्रेष्ठ, राजु रिजाल, मोहम्मद साम्सद शेख, अमर सिंह राउटेला, सुवास खकुरेल, आकाश चन्द, अमृत भट्टाई, शेर मल्ल, सागर पुन र दीपेन्द्र रावत लगायतका खेलाडी छन् । चौथो संस्करणको इपिएल आगमी असोज ९ देखि २३ सम्म टियु मैदानमा हुने कार्यक्रम छ ।
