गृहमन्त्रीलाई सांसदहरूको प्रश्न – तुइन आफैं चुँडिएको भन्न खोजिएको हो ?

१९ साउन, काठमाडौं ।
गृहमन्त्री बालकृष्ण खाणले जयसिंह धामी बेपत्ता भएको घटनामा एसएसबीको संलग्नताबारे मौन बसेपछि एमाले सांसदहरूले प्रश्न उठाएका छन् । पूर्वगृहमन्त्री तथा एमाले सांसद खगराज अधिकारीले यस घटनामा गृहमन्त्रीको प्रस्तुति गैरजिम्मेवारपूण भएको बताए ।

उनले भने, ‘यस्तो अपराधपूर्ण क्रियाकलापबाट मृत्युवरण हुँदा नेपाल सरकार चाहिँ आफैं चुँडिएको जस्तो निमुखो तरिकाले प्रस्तुत भएको छ । यो हाम्रो स्वाभिमानविपरीत हो । यस्तो तरिकाले अपराधीमाथि कारवाही हुन सक्दैन ।’

एमालेकी अर्का सांसद शान्ता चौधरीले पनि गृहमन्त्री हल्का र गैरजिम्मेवाररूपमा प्रस्तुत भएको आरोप लगाइन् । उनले भनिन्, ‘प्रत्यक्षदर्शीले नै एसएसबीले तुइन काटेको भनिसकेका छन् । गृहमन्त्री अझै हामी जानकारी लिइरहेका छौं भन्नुहुन्छ । यस्तो हल्का पाराले प्रस्तुत हुन उहाँलाई नैतिकताल दिँदैन । एसएसबीको ज्यादतीमा हामी मौन बस्न सक्दैनौं ।’

सांसद गणेशसिंह ठगुन्नाले पनि प्रत्यक्षदर्शीका बयान आइसक्दा पनि सरकारले आलटाल गरेको बताए ।