२७ साउन, काठमाडौँ ।
नेपाल विद्युत् प्राधिकरणको कार्यकारी निर्देशक कुलमान घिसिङले पदभार ग्रहण गरेका छन् । बुधबार घिसिङले विद्युत् प्राधिकरणको कार्यालयमा पुगेर पदभार ग्रहण गरेका हुन् ।
बुधबार नै उनलाई ऊर्जा, जलस्रोत तथा सिँचाइमन्त्री पम्फा भुसालको उपस्थितिमा मन्त्रालयका सचिव देवेन्द्र कार्कीले नियुक्तिपत्र प्रदान गरेका थिए। नियुक्तिपत्र प्रदान गरेसँगै घिसिङले विद्युत् प्राधिकरणको कार्यालयमा पुगेर पदभार ग्रहण गरेका हुन् । उनलाई प्राधिकरणका कर्मचारीले स्वागत गरेका थिए ।
सोमबार बसेको मन्त्रिपरिषदको बैठकले पूर्वकार्यकारी निर्देशक घिसिङलाई पुनः नियुक्ति गरेको हो । अघिल्लो ४ बर्षे कार्यकालमा प्राधिकरणलाई नाफामा लगेका घिसिङले देशलाई लोडसेडिङमुक्त गरेपछि चर्चामा आएका थिए ।
सरकारले यसअघि प्राधिकरणका कार्यकारी निर्देशक रहेका हितेन्द्रदेव शाक्यलाई भने जल तथा ऊर्जा आयोगमा कार्यादेशसहित विशिष्ठ श्रेणीको पूर्णकालीन सदस्यका रुपमा नियुक्त गरेकाे छ ।
