२८ साउन, काठमाडौँ ।
प्रधानन्यायाधीश चोलेन्द्र शमशेर जबराले न्यायपालिकाले देश, जनता र संविधानका लागि समर्पित भएर काम गर्दै आएको बताएका छन् ।
नेपाल बार काउन्सिलको २८ औँ स्थापना दिवस तथा काउन्सिलद्वारा प्रकाशित कानून पत्रिकाको बुधबार ललितपुरमा लोकार्पण गर्दै प्रधानन्यायाधीश जबराले देश र जनताप्रति अभिप्रेरित भएर न्यायपालिकाले काम गर्दै आएकाले न्यायपालिका कहिल्यै पनि आफ्नो कर्तव्यबाट नचुक्ने बताए । उनले कुनै पनि फैसलालाई लिएर न्यायपालिकामाथि आरोपित नगर्न आग्रह गरेका छन् । ‘न्यायपालिकाले गर्ने सबै फैसलाहरु समाज र नागरिकसँग अभिप्रेरित हुन्छ । र समाजलाई हेरेर नै जहिले पनि न्यायपालिकाले फैसला गरिरहेको हुन्छ । न्यायपालिकालाई निरन्तर अघि बढिरहन दिनुपर्दछ । अथवा न्यायपालिकालाई दोष पनि दिनु हुन्न । र महत्व पनि दिनुहुन्न’ उनले भने ।
जबराले आफूले कहिल्यै पनि दबाब र प्रभावमा परेर फैसला नगरेको पनि बताए । उनले न्यायपालिकाको सबलीकरणका लागि न्याय परिषद्को संरचनामा सुधारको आवश्यकता रहेको पनि बताए ।
कार्यक्रममा कानून न्याय तथा संसदीय मामिला मन्त्री ज्ञानेन्द्रबहादुर कार्कीले मर्यादित समाज निर्माणमा सबै जुट्नुपर्नेमा जोड दिए ।
कानून मन्त्री कार्कीले न्यायपालिकाले संविधानको रक्षा गर्ने काम गर्दे आएको उल्लेख गर्दै देशको हितका निम्ति सबैलाई एक ठाउँमा उभिन आग्रह गरे।
महान्यायाधिवक्ता एवं नेपाल कानून व्यवसायी परिषद्का अध्यक्ष खम्बबहादुर खातीले न्याय क्षेत्रलाई विश्वसनीय बनाउनु सबैको जिम्मेवारी भएको बताए ।
त्यस अवसरमा नेपाल बार एशोसिएसनका अध्यक्ष चण्डेश्वर श्रेष्ठ, पूर्व महान्यायाधिवक्ता रमेश बडाल, वरिष्ठ अधिवक्ता कृष्णप्रसाद भण्डारी लगायतका वक्ताले संविधानको रक्षकको रुपमा न्यायपालिकाले भूमिका खेल्नुपर्ने र त्यसमा सबैको सकारात्मक सहयोग रहनुपर्नेमा जोड दिए ।
