३२ साउन, एजेन्सी ।
अफगानिस्तानमा तालिवानले सत्ता हातमा लिएपछि चीनले आफू तालिबानसँग मैत्रीपूर्ण सम्बन्ध बनाउन चाहेको बताएको छ ।
समाचार एजेन्सी एएफपीका अनुसार चीनको विदेश मन्त्रालयकी प्रवक्ता हुआ चुनयिंगले सोमवार संवाददातासँग भनिन्, ‘अफगान नागरिक आफ्नो भविष्यको फैसला आफैँ गरून्, चीन उनीहरूको यो हकको सम्मान गर्छ । चीन अफगानिस्तानसँग मैत्रीपूर्ण र सहयोगी सम्बन्धको विकास गर्न इच्छुक छ ।’
उनले आइतबार अफगानिस्तानमा तालवानले युद्धको अन्त्य भएको र समावेशी तथा खुला इस्लामिक सरकार गठनका साथै जनताको सुरक्षाको जिम्मा लिने तालिवानी नेताहरूको भनाइमा आफूले ध्यान दिएको पनि बताइन्। उनले भनिन्, ‘यी भनाइहरूको कार्यान्वयन हुने र स्थितिको शान्तिपूर्ण रूपान्तरण तथा सबै प्रकारका अपराध तथा आतंकवादको अन्त्य हुनेमा चीन आशावादी छ।’
उनले अफगानिस्तानमा रहेको चिनियाँ दूतावास र कर्मचारीहरूले सामान्य रूपमा आफ्नो काम जारी राखेको बताउँदै अफगानिस्तानबाट अधिकांश चिनियाँ नागरिकहरू दूतावासको पहलमा अघि नै चीन फर्किए र बाँकी चिनियाँहरू दूतावासको सम्पर्कमा रहेको जानकारी दिइन्।
यसअघि चीनले आफगानिस्तानमा आफ्नो दूतावास खुलै राख्ने सङ्केत दिएको थियो । चीनले अफगानिस्तानमा रहेका आफ्ना नागरिकलाई घरभित्रै रहन स्थितिको बारेमा सजग रहन आग्रह गरेको छ ।
तालिबानका प्रतिनिधि गएको जुलाईमा चीन गएका थिए र उनीहरूले चिनियाँ विदेश मन्त्री वांग यीसँग भेट गरेका थिए । त्यस समय यस भेटलाई राजनीतिक शक्तिको रूपमा तालिबानको अन्तर्राष्ट्रिय मान्यताको रूपमा हेरिएको थियो ।
