३ भदौ, काठमाडौँ।
माओवादी केन्द्रका अध्यक्ष पुष्पकमल दाहालले गठबन्धनको सरकारले लोकतन्त्र, गणतन्त्र, संघीयता र संविधानको रक्षा गर्नका लागि राजनीतिक दलसम्बन्धीको अध्यादेश ल्याएको बताएका छन् ।
बिहीबार समाजवादी केन्द्र नेपालले आयोजना गरेको कार्यक्रममा बोल्दै अध्यक्ष दाहालले अहिलेको अध्यादेशको उद्देश्य संघीयता, लोकतन्त्र, गणतन्त्र र संविधानको रक्षा गर्नु रहेको दाबी गरे ।
ओली सरकारले ल्याएको अध्यादेशको उद्देश्य लोकतन्त्र र परिवर्तनका उपलब्धी, संविधानलाई संकटमा पार्नु रहेको उनको भनाइ थियो । उनले भने, ‘अध्यादेशको विषयमा अहिले डिबेट भएको छ । पहिला र अहिलेको अध्यादेशबीचमा आकाश जमिनको फरक छ । एउटै जसरी बुझियो । एउटा अध्यादेशको उद्देश्य लोकतन्त्र,संविधान र गणतन्त्रलाई सिध्याउनु थियो भने अर्कोको उद्देश्य प्राप्त उपलब्धीहरुको रक्षा गर्नु हो ।’
बुधबार राष्ट्रपति विद्यादेवी भण्डारीले मन्त्रीपरिषद्को सिफारिसमा राजनीतिक दल विभाजन सम्बन्धी अध्यादेश जारी गरेकी थिइन् । दल विभाजनका लागि सहन हुने गरी अध्यादेश ल्याइएको भन्दै विरोध भइरहेको छ ।
