५ भदाै, सुनसरी ।
कृषि मजदुरको अभाव र उत्पादनपछि मूल्य नपाउने समस्याले सुनसरीमा जुट खेती घट्दै गएको छ । जुट खेतीमा किसानको आकर्षण वर्षेनी घट्दै गएपछि मोरङ–सुनसरी औद्योगिक कोरिडोरका जुट उद्योगलाई कच्चा जुटको अभाव हुन थालेको छ ।
मजदुरको अभाव र उत्पादित जुटले राम्रो मूल्य नपाउने समस्याकै कारण किसानले जुट खेतीलाई झन्झटको रूपमा लिँदै खेती गर्न छोड्न थालेको देवनागञ्जका किसान दिलिप कुमार मेहता बताउँछन् ।
नेपालमै सबैभन्दा बढी क्षेत्रफलमा जुट खेती हुने जिल्ला सुनसरी भएपनि अहिले जुट खेती खुम्चँदै गएको छ । कच्चा जुट अभावका कारण सुनसरी–मोरङ औद्योगिक कोरिडोरका जुट उद्योगले भारत र बङ्गलादेशबाट जुट आयात गरेर वस्तु उत्पादन गर्दै आइरहेका छन् ।
स्वदेशी कच्चा पदार्थ उत्पादनमा वर्षेनी कमी हुँदै गएपछि ठूलो लगानीका र धेरै मजदुरलाई रोजगारी दिने उद्योग समेत समस्यामा पर्दै गएको उद्योगीहरु बताउँछन् ।
यस क्षेत्रमा चालु अवस्थामा रहेका ५ वटा जुट उद्योगलाई वस्तु उत्पादन गर्नका लागि आवश्यक पर्ने कच्चा जुटको ३० प्रतिशत मात्र नेपाली जुट उत्पादनले धान्दै आएको छ । बाँकी ७० प्रतिशत कच्चा जुट भारत र बङ्गलादेशबाट आयात गरिन्छ । जसमध्ये ५५ प्रतिशत भारत र १५ प्रतिशत बङ्गलादेशबाट आउने गरेको उद्योगीहरु बताउँछन् ।
कच्चा जुट अभावकै कारण सुनसरी, मोरङ औद्योगिक क्षेत्रमा खुलेका ११ मध्ये हाल ५ वटा मात्र जुट उद्योग सञ्चालनमा छन् । कोरिडोरका ५ उद्योगले समेत कच्चा जुट आयात गरेर उत्पादित वस्तुको निकासी गर्दै आएका छन् ।
सुनसरीको इनरुवाको बबिया, कोसी, भोक्राहा नरसिंह, हरिनगर, देवनागञ्ज, बर्जु र गढी गाउँपालिका क्षेत्रमा बढी मात्रामा जुट खेती हुँदै आएको छ ।
