७ भदौ, काठमाडौं ।
भारतीय जनता पार्टी (भाजपा)का विदेश विभाग प्रमुख विजय चौथाइवालेले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँग भेटवार्ता गरेका छन् आइतबार नेपाल आएका चौथाइवालेले सोमबार खुमलटार पुगेर प्रचण्डसँग भेटवार्ता गरेका हुन्।
भेटवार्तामा प्रचण्डसँग नेपाल र भारतसँगको सम्बन्ध विस्तारका साथै अन्य विषयमा पनि खुलेर छलफल भएको चौथाइवालेले ट्वीटमार्फत जानकारी दिएका छन् । वार्ता र संवादकै माध्यमबाट नेपाल–भारत सम्बन्धलाई अझ मजबुद बनाउने विषयमा दुवै जना सहमत भएको उनको भनाइ छ।
आइतबार उनले प्रधानमन्त्री शेरबहादुर देउवासँग सरकारी निवास वालुवाटारमा भेटघाट गरेका थिए। आइतबारै उनले कांग्रेस नेता एवं पूर्व परराष्ट्रमन्त्री प्रकाशशरण महतसँग पनि भेटघाट गरेका थिए ।
केही दिन काठमाडौंमा रहँदा उनले अन्य राजनीतिक दलका शीर्ष नेताहरुसँग भेटघाट गर्ने कार्यक्रम छ ।
