८ भदाै, वीरगंज ।
वीरगन्जको सीमावर्ती भारतीय सहर रक्सौलको अहिरौलिया पञ्चायत शिवपुर बिर्ता गाउँमा पोखरीमा डुबेर बाख्रा चराउन गएका ५ जना बालिकाको मृत्यु भएको छ ।
आज दिउँसो सवा दुई बजे बाख्रा चराउन गएका बालिकाहरुमध्ये एक जना पोखरीमा डुबेपछि एकले अर्कालाई बचाउने क्रममा ५ जनाकै डुबेर मृत्यु भएको रक्सौल अहिरौलिया पञ्चायतका मुखिया भिखारी दासले जानकारी दिएका छन् ।
मृतक बालिकाहरूमा शिवपुर बिर्ता गाउँ निवासी रमेश महतो की १० वर्षीया छोरी सरिता कुमार महतो, भिखर महतोकी १० वर्षीया छोरी कौशल्या कुमारी र ८ वर्षीया छोरी सीमा कुमारी, बद्री महतोकी १० वर्षीया छोरी शोभा कुमारी, अवधेश महतोकी ११ वर्षीया छोरी सुगी कुमारीको मृत्यु भएको जनाइएको छ ।
मृतक बालिकाहरूको शव पोखरीबाट निकालेर पोस्टमार्टमका लागि मोतिहारी अस्पताल पठाइएको छ ।
