काठमाडौं : आफ्नै आर्थिक नियमको धज्जी उडाउँदै गत वर्ष एउटै बैठकमा तीन लाख ३९ हजारको चिया पिएको काठमाडौं महानगरपालिकाका जनप्रतिनिधिले त्यसभन्दा अघिल्लो वर्ष झन धेरै आर्थिक बेथिति गरेको सार्वजनिक भएको छ ।
महालेखापरीक्षकको कार्यालयको ५८ औ प्रतिवेदनअनुसार उनीहरुले कानुनविपरित एकै दिन एकभन्दा बढी बैठक बसेर सुविधा मात्रै लिएका छैनन्, लकडाउनको समयमा समेत अतिरिक्त काम गरेको भन्दै लकडाउन भत्ता पनि बुझेका छन् ।
मेयर उपमेयरसहितको पदाधिकारीहरुले यसरी नियमविपरित बुझेको एक करोड ३६ लाख ४४ हजार असुल गर्न महालेखाले निर्देशन दिएको छ ।
उनीहरुले नगरसभा र नगरकार्यपालिका बैठकको मात्रै अतिरिक्त २६ लाख १२ हजार भत्ता बुझेका छन् । एक दिनमा एउटा बैठकको मात्रै भत्ता बुझ्न पाइने नियम भए पनि उनीहरुले एकै दिन दुईवटा बैठक राखेरसमेत भत्ता बुझेको महालेखाको ५८ औ वार्षिक प्रतिवेदनअन्तगर्तत काठमाडौं महानगरपालिकाको अन्तिम लेखापरीक्षणमा उल्लेख छ ।,याे समाचार नयाँ पत्रिका दैनिकमा छापिएकाे छ ।
