११ भदौ, एजेन्सी ।
पोर्चुगिज सुपरस्टार क्रिस्टियानो रोनाल्डोले इटालियन क्लब युभेन्ट्स छाड्ने निर्णय गरेका छन् । इंग्लिस कल्ब म्यान्चेस्टर सिटी जाने चर्चा चलिरहेको बेलमा उनले युभेन्टस छाड्न लागेका हुन्। प्रशिक्षक मासिमिलियानो एलेग्रीले शुक्रबार रोनाल्डोले युभेन्टस छाड्ने निर्णय गरेको पुष्टि गरे।
रोनाल्डोले प्रशिक्षणमा खेलाडीहरुसँग बिदा पनि लिइसकेको बुझिएको छ । उनी प्रशिक्षण केन्द्र पुगेर ४० मिनेटमै फर्किएका थिए। रोनाल्डोको निर्णयसँगै युभेन्ट्स रोनाल्डोको प्रस्तावको पखाईमा रहेको छ ।
युभेन्ट्सले कम्तीमा पनि ३० मिलियन युरोको माग गर्न सक्ने आँकलन गरिएको छ । रोनाल्डोको एजेन्ट जोर्गे मेन्डेस म्यानचेस्टर सिटीसँगको सम्झौताका लागि अन्तिम कसरतमा छन् । पेप ग्वार्डिओला रोनाल्डो क्लबमा आउनेमा विश्वस्त छन् ।
रोनाल्डो र सिटीबीच सम्झौता भएको अवस्थामा रोनाल्डो २००९ पछि प्रिमियर लिगमा फर्कनेछन् । रोनाल्डो सन् २००९ मा त्यतिबेलाको विश्व कीर्तिमानी मुल्यमा स्पेनिस क्लब रियल म्याड्रिडमा पुगेका थिए । रियलको सर्वाधिक गोलकर्ता बनेका रोनाल्डोले सन् २०१८ मा रियल छाड्दै युभेन्ट्स पुगेका थिए ।
रोनाल्डोले २००३ देखि २००९ सम्म म्यानचेस्टर युनाइटेडबाट खेलेका थिए । उनले युनाइटेडबाट २९२ खेलमा ११८ गोल गरेका थिए । त्यसपछि रोनाल्डोले रियलमा ९ सिजनमा ४३८ खेलमा ४५० गोल गरेका थिए । युभेन्ट्समा तीन सिजन खेल्दा रोनाल्डोले १३४ खेलमा १०१ गोल गरेका छन् ।
रोनाल्डोले म्यानचेस्टर युनाइटेडबाट तीन प्रिमियर लिग, दुई लिग कप र समान एकपटक एफए कप कम्युनिटी शिल्ड, च्याम्पियन्स लिग र फिफा क्लब विश्वकप जितेका छन् । रियलबाट चार पटक च्याम्पियन्स लिग, दुई पटक ला लिगा, कोपा डेल रे, सुपर कोपा, युइएफए सुपर कप र तीनपटक फिफा क्लब विश्वकप जितेका छन् ।
