१४ भदाै, दार्चुला ।
दार्चुलाका विभन्न भेगमा आएको बाढी र पहिरोका कारण ३ जनाको मृत्यु भएको छ भने दुई जना वेपत्ता भएका छन् ।
आइतबार राति आएको बाढिपहिरोमा परी दुहुँ गाउँपालिका र महाकाली नगरपालिकाका विभिन्न क्षेत्रमा भौतिक तथा मानवीय क्षति गरेको हो ।
पहिरोले घर पुरिँदा दुहु गाउँपालिका-१ बासपालिकाका नरसिंह महर र उनकी श्रीमती कौशा महरको मृत्यु भएको छ । राति सुतिरहेकै अवस्थामा घरमाथिबाट खसेको पहिरोले उनीहरूको पुरिएर मृत्यु भएको जिल्ला प्रहरी प्रमुख डिएसपी मनोहरप्रसाद भट्टले बताए ।
यस्तै दुहु गाउँपालिकाको वडा नम्बर ५ दुल्लामा बाढीले मनुवा डडालको पनि मृत्यु भएको छ । कालागाड खोलामा बेलुकी १० बजेदेखि आएको बाढीले डडाललाई घरैसहित बगाएको हो ।
बाढीले घरजग्गासहित पुल जलविद्युत, पानी घट्ट र पशुचौपापायामा समेत क्षति पुर्याउको छ । यो क्षेत्रमा पाँचवटा पसल, दुईवटा लघु जलविद्युत् आयोजना, चारवटा झोलुंगे पुल र एउटा पक्की पुल पनि बगेको स्थानीयले बताएका छन् ।
त्यस्तै वडा नम्बर ३ निजाङगाडमा बाढीले दुई जना बेपत्ता छन् । निजाङगाड खोलाको बाढीले स्थानीय शेरसिंह कार्की र हरकसिंह कार्की वेपत्ता भएको स्थानीय दिलिपसिह कार्कीले जानकारी दिए ।
निजाङगाडकै खोलाले दार्चुला–तिंकर सडक मोटरेबल पुल, दुइटा झोलुंगे पुल बगाएको छ । यो क्षेत्रम रहेका आधार्दजन घर तथा पसलहरु बगाएको छ ।
दार्चुला तिंकर सडक खण्डकिो निजाङगाड पुल बग्दा दुहुँ र व्याँस गाउँपालिकाको सम्बन्ध विच्छेद भएको छ । दुहुँ ३ को श्रीवगडमा निजाङगाडले पूर्ण बहादुर बम, नरेन्द्र बहादुर बम, दिपक बम, रणबहादुर बम धिरेन्द्र बम, शेरबहादुर बमको घर बगाएको छ । यस्तै महाकाली नगरपालिका १ को श्रीबगडमा देव बहादुर बम, अमरबहादुर बम, सुन्दर बहादुर बम र जित बहादुर बमको होटल तथा पसल बगाएको छ ।
यस्तै निजाङगाड खोला नजिकै रहेको अपि नाम्पा संरक्षण क्षेत्र कार्यालयको रेन्जपोष्ट भवनको आधा भाग बगाएको छ । अहिले घट्नास्थलमा नेपाल प्रहरी, सशस्त्र प्रहरी, नेपाली सेना, रेडक्रस र स्थानीयहरु पुगेका छन् ।
वारीपारी जाने बाटो नहुँदा स्थानीयलाई उद्धारमा समस्या भएको छ । अहिले यो क्षेत्रमा तुइन लगाएर भए पनि समान सार्न सुरक्षाकर्मी परिचालन गरिदै छ । निजाङगाड खोलाले खानेपानीको मुहान र पाइप बगाएपछि श्रीवगड क्षेत्रमा खानेपानीको हाहाकार भएको छ । राती दुई बजे देखि स्थानीयले पानी खान पाएका छैनन् ।
वानाला खानेपानी योजनाबाट महाकाली नगरपालिका १, श्रीवगड र दुहुँ गाउँपालिका ३ श्रीवगडमा खानेपानी ल्याइएको थियो । महाकाली नगरपालिकाको श्रीवगडमा ४० परिवारको बसोबास छ भने दुहुँको श्रीवगडमा १५ परिवार बस्दै आएका छन् ।
अहिले गाउँमा पानी नभएपछि समस्या भएको स्थानीय मानबहादुर बमले बताए ।
