१५ भदौ, काठमाडौँ ।
वाग्मती प्रदेशका नेकपा एमालेका ११ सांसदले पार्टी छाड्दै नवगठित नेकपा (एकीकृत समाजवादी) पार्टी रोजेका छन् ।
नेकपा एमालेको तर्फबाट प्रदेशसभा सदस्य भएका उनीहरुले पार्टी विभाजन भएसँगै मंगलबार वाग्मती प्रदेश निर्वाचन आयोगको कार्यालय हेटौंडामा उपस्थित भएर नवगठित नेकपा (एकीकृत समाजवादी) पार्टी रोज्दै सनाखत गरेका हुन् ।
नेकपा (एकीकृत समाजवादी) पार्टी रोज्ने सांसदहरुमा राजेन्द्र पाण्डे, मुनु सिग्देल, बसुन्धरा हुमागाईं, लक्ष्मण लम्साल, राजेन्द्रमान श्रेष्ठ, पार्वती सिलवाल, इन्द्रमाया गुरुङ, माधव पौडेल, बसन्त मानन्धर, रमा आले मगर र कुसुमकुमार कार्की छन् ।
अझै केही सांसदहरु थपिने जनाइएको छ । प्रदेशका सामाजिक विकास मन्त्री समेत रहेका कृष्ण शर्मा खनालले पनि सनाखत गर्ने भएका छन् । खनाल अष्टलक्ष्मी शाक्य नेतृत्वको सरकार गठन भएकै दिन मन्त्री बनेका थिए । मन्त्री खनालले आजै निर्वाचन आयोगको कार्यालय पुगेर सनाखत गर्ने बताए ।
१२ जना सांसदहरुले नयाँ दल रोजेसँगै प्रदेश सरकार गठन भएको करिब दुई हप्तामै अल्पमतमा परेको छ ।
