१ असोज, काठमाडौं ।
सत्ता गठबन्धनभित्र रहेको राष्ट्रिय जनमोर्चाले वर्तमान सरकारबाट देश र जनताका सबै समस्या समाधान हुनेछन् भन्ने विश्वास घट्दै गएको आरोप लगाएको छ।
गठवन्धनलाई सर्मथन गरेको तर सरकारमा सहभागी नभएको जनमोर्चाले एक विज्ञप्ति जारी गर्दै सरकारमाथि यस्तो आरोप लगाएको हो।
‘प्रतिगमनविरुद्ध हामीले वर्तमान सरकारलाई समर्थन गरेका हौँ। यद्यपि हाम्रो समर्थन निःशर्त नभएर सशर्त नै हो ’ अध्यक्ष चित्रबहादुर केसीले जारी गरेको विज्ञप्तिमा भनिएको छ, ‘सरकार गठन भएको यतिका समय बितिसक्दा पनि सरकारले पूर्णता पाउन सकेको छैन। महङ्गी, भ्रष्टाचार दिनानुदिन बढेको छ। त्यसलाई नियन्त्रण गर्ने सवालमा सरकारले कुनै ध्यान दिएको छैन, जसको परिणाम सरकारप्रति जनताको अविश्वास बढ्दै गएको छ।’
जनमोर्चाले महाकाली नदीमा तुइन काटेर भारतीय पक्षबाट जयसिंह धामीको हत्या गरिनु, दार्चुलास्थित नेपाली आकाशमा नेपालको स्वीकृति बिना हेलिकप्टर उडाउने जस्ता भारतका हस्तक्षेपकारी कदमविरुद्ध वर्तमान सरकारबाट कुनै तत्परता नदेखाउने कार्य गलत भएको जनाएको छ।
कालापानीबाट भारतीय सेना फिर्ता गराउने तथा कालापानी क्षेत्रस्थित गाउँहरुमा राष्ट्रिय जनगणना गराउने सवालमा सरकार भारतका अगाडि झुकेको आरोप जनमोर्चाले लगाएको छ।
‘जनजीविकाको समस्या हल गर्ने सवालमा सरकारले कुनै प्रभावकारी कदम चाल्न सकेको छैन। महङ्गी र कालो बजारी अत्यन्त बढेर गएको छ,’ विज्ञप्तिमा भनिएको छ, ‘एकातिर कोरोना महामारीका कारण जनताको दैनिक आम्दानी घटेको छ भने अर्कोतर्फ दिनानुदिन महङ्गी बढेको छ। त्यसले सर्वसाधारण जनतालाई निकै ठूलो मार परेको छ।’
देशमा भ्रष्टाचार निकै बढेको र देशका कैयौँ स्थानीय तहहरु भ्रष्टाचारका अखडा बनेको आरोप उसले लगाएको छ।
भ्रष्टाचारलाई नियन्त्रण गर्नका लागि सरकारले कुनै प्रभावकारी कदम चाल्न नसकेको र सरकार निर्माण भएको दुई महिनासम्म पनि मन्त्रीमण्डल विस्तार गर्न नसकेको भन्दै उसले आलोचना गरेको छ। जनमोर्चाले एमसीसी पारित गर्ने कार्य गर्न नहुनेमा पनि जोड दिएको छ।
