६ असाेज, रुपन्देही ।
बुटवल उपमहानगरपालिकाका मेयर शिवराज सुवेदीमाथि आक्रमण गर्ने बुटवल ३ का युवा गणेश पंगेनीविरुद्ध रुपन्देही प्रहरीले सार्वजनिक अपराधको मुद्दा चलाएको छ । पंगेनीलाई आज सार्वजनिक अपराधको मुद्दा दर्ता गरी थप अनुसन्धानका लागि म्याद थप गरिएको प्रहरीले जनाएको छ ।
सोमबार बिहान बुटवल–३ ज्योतिनगरको पहिरो अवलोकन गर्ने क्रममा उपमहानगर प्रमुख सुवेदीलाई पंगेनीले एक्कासी मुक्का हान्न खाेजेका थिए । मेयर सुवेदीलाई भने नगर प्रहरीले जाेगाएपछि उनी भुँइमा लडेका थिए ।
मेयर सुवेदीले उनलाई कुनै कारबाही अगाडि नबढाउन सार्वजनिक अपील गरेका थिए । मेयर सुवेदीले आफूमाथि आक्रमण गर्ने युवालाई कुनै पनि मुद्दा नचलाउन र हिरासतमा नराख्नका लागि प्रहरीलाई आग्रह गरेपनि प्रहरीले स्थलगत मुचुल्का र प्रतिवेदनका आधारमा मुद्दा चलाएको बुटवल इलाका प्रहरी कार्यालयका डीएसपी मनोज कुँवरले बताए ।
उनलाई थप अनुसन्धानका लागि मंगलबार ५ दिनको म्याद थप गरिएको कुँवरले जानकारी दिए । उपमहानगर प्रमुख सुबेदीले बाढी तथा पहिरो पीडितहरुको आक्रोशलाई स्वभाविक भएको बताउँदै आफ्नो कसैप्रति आग्रह–पूर्वाग्रह नरहेको उल्लेख गरेका थिए ।
