८ असाेज, काठमाडौं ।
नारायणहिटी दरबार सङ्ग्रहालयमा राखिएको श्रीपेच निकाल्न खोज्ने क्रममा पक्राउ परेका खिमबहादुर घर्तीले आफूलाई राजा हुन मन लागेर श्रीपेच निकाल्न खोजेको बताएका छन् । उनले दरबारमा बस्न मन लागेर श्रीपेच निकाल्न खोजेको प्रहरीसमक्ष बयान दिएकाे स्राेतले जनाएकाे छ ।
शुक्रबार बिहान अवलोकन गर्न पुगेका पश्चिम रुकुम मसिकोट ११ का घर्तीले श्रीपेच राखिएको ठाउँबाट खुकुरी झिकेर सिसा फुटाउन खोजेका थिए। घर्तीले देशलाई राजा आवश्यक रहेको र आफू राजा भएको भनेर हल्ला गर्दै श्रीपेच निकाल्न खोजेको एक प्रत्यक्षदर्शीले जानकारी दिए।
श्रीपेच भने बुलेटप्रुफ सिसाभित्र रहेकाले सुरक्षित रहेको छ । उनी अहिले प्रहरी नियन्त्रणमा छन्। घटनाबारे थप अनुसन्धान भइरहेको जनाइएको छ।
त्यहाँ सुरक्षामा खटिएका नेपाली सेनाले उनलाई नियन्त्रणमा लिएको थियो। सिसा फुटाउँदा घर्तीको हात समेत काटिएको छ।
