११ असोज, धनगढी ।
दशै तिहार लगायत चाडपर्वका बेला हुनसक्ने सम्भावित घटना तथा दुर्घटनालाई ध्यानमा राखेर कैलाली प्रहरीले विशेष सुरक्षा योजना लागू गरेको छ । चाडपर्वलाई लक्षित गरेर बिशेष सुरक्षा योजना बनाएर लागू गरिएको जिल्ला प्रहरी कार्यालयका प्रमुख प्रहरी उपरीक्षक (एसपी) विश्व अधिकारीले जानकारी दिए ।
धनगढी उप–महानगरपालिका र अन्य भू–भाग गरी कैलाली जिल्लालाई दुई भागमा विभाजन गर्दै विशेष सुरक्षा योजना लागू गरिएको उनले बताए । एसपी अधिकारीका अनुसार कैलालीको एक सय ७३ स्थानमा विशेष टोली परिचालन गरिएको छ । धनगढी उपमहानगरपालिकाका ५६ स्थान बाँकी ११७ भागमा विशेष टोली परिचालन गरेको बताए ।
प्रहरीले त्रिनगर भन्सार नाकादेखि टीकापुरसम्म विभिन्न स्थानमा नागरिक सहायता कक्ष स्थापना गर्ने, राजमार्ग क्षेत्रमा रिफ्रेस सेन्टर स्थापना गर्ने, राजमार्ग क्षेत्रमा सरप्राइज चेकिङ गर्ने, स्थानीय प्रशासनसँगको समन्वयमा बजार अनुगमन गर्ने विषयलाई समेत सुरक्षा योजनामा समेटेको छ । चाडपर्वका बेला सीमा नाका र बैंक तथा वित्तीय संस्थाहरु हुने स्थानलाई लक्षित गर्दै कडाइको नीति लिएको एसपी अधिकारीले बताए । उनका अनुसार सीमा नाकामा यात्रु ठगिने तथा लागुऔषध, विस्फोटक पदार्थ जस्ता वस्तु ओसारपसार हुनसक्ने भएकाले कुकुर समेत परिचालन गर्ने योजना बनाइएको छ ।
जिल्लाभरि सादा पोसाकका प्रहरी लगायत विभिन्न कमाण्ड पोष्टका प्रहरी गरी जिल्ला भर करिब साढे सात सयको हाराहरिमा प्रहरी खटाएको र सोही हाराहारीमा सशस्त्र प्रहरी पनि परिचालन हुने उनले जानकारी दिए । एसपी अधिकारीले आफ्नो सुरक्षा सतर्कतामा सबैभन्दा बढी भूमिका आफ्नो नै रहने भएकोले सबैले आफू स्वयमलाई चनाखो बनाएर राख्न र प्रहरी लाई समेत सुरक्षा अनुभूति दिलाउने कार्यमा सक्दो सहयोगी भूमिका निर्वाह गर्न आम नागरिक वर्गमा आग्रह गरेका छन् ।
