काठमाडौं : प्रदेश २ सरकारले मुख्यमन्त्री ‘बेटी पढाउ बेटी बचाउ’ कार्यक्रमका लागि चार चरणमा गरेर अहिलेसम्म ४१ हजार दुई सय ६२ थान साइकल खरिद गरेको छ । तर, केही महिनाको अन्तरमा भएका खरिदमा साइकलको मूल्यमा धेरै अन्तर छ ।
०७७ चैतमा मुख्यमन्त्री कार्यालयको सार्वजनिक खरिद ऐन विपरित उत्पादक कम्पनीको नाम मोडल र ब्रान्ड नै उल्लेख नभएका १७ हजार दुई सय ६२ थान साइकल ६ हजार चार सय ३२ रुपैयाँका दरले खरिद गरेको थियो । त्यसको तीन महिनामै थप १० हजार साइकल खरिद गर्दा प्रतिसाइकल दुई हजार १४ रुपैयाँ बढी तिरिएको छ ।
०७८ असारमा साइनो इन्टरनेसनलमार्फत हाई एण्ड कम्पनीका साइकल प्रतिगोटा आठ हजार चार सय ४६ का दरले खरिद गरिएको हो । चैतमा १७ हजार दुई सय ६२ साइकलका लागि ११ करोड १० लाख २९ हजार एक सय ८४ रुपैयाँमा खर्च गरेको प्रदेश सरकारले असारमा १० हजार थानकै लागि आठ करोड ४४ लाख ६० हजार तिरेको छ ।
अझ गम्भीर पाटो त यो छ कि कम कबोल गर्ने ठेकेदार कम्पनीलाई अस्वीकार गरेर बढी रकम प्रस्ताव गर्नेलाई ठेक्का दिइएको छ । तीन कम्पनी म्याप हेलेक्सी, ओम सत्यसाई प्रालि र साइनो इन्टरनेसनलले ठेक्कामा प्रतिस्पर्धा गरेका थिए ।
हेलेक्सीले सबैभभन्दा कम प्रतिसाइकल भ्याटबाहेक ६ हजार ९ सय ७० रुपैयाँमा प्रस्ताव गरेको थियो । यसमा १३ प्रतिशत भ्याट जोड्दा पनिप्रतिसाइकलको मूल्य सात हजार आठ सय ७६ मात्रै पर्दथ्यो । तर, मुख्यमन्त्री कार्यालयले भ्याटसहित आठ हजार चार सय ४६ रुपैयाँ कबोल गर्ने साइनो इन्टरनेसनललाई खरिद जिम्म दियो ।
स्रोतकाअनुसार साइनोको ठेक्का दिलाउनकै लागि स्पेसिफिकेसनमा एकैपटक आठ हजारसम्म साइकल आपूर्ति गरेको अनुभवी कम्पनी हुनुपर्ने प्रावधान थप गरिएको थियो । किनभने यही कार्यक्रमअन्तर्गत ०७६ भदौमा १० हजार साइकल आपूर्ति गरेको अनुभव साइनोसँग थियो । त्यतिखेर प्रिन्स कम्पनीको प्रतिसाइकल ६ हजार सात सयका दरले आपूर्ति थियो ।
मुख्यमन्त्री तथा मन्त्रिपरिषद् कार्यालयका सचिव यामप्रसाद भुषलले अघिल्लोपटकको भन्दा साइकल गुणस्तरीय रहेको र फलामको मूल्य बढेकाले बढी मूल्य परेको दाबी गरे ।,याे समाचार नयाँ पत्रिका दैनिकमा छापिएकाे छ ।
