१४ असोज, काठमाडौं।
अखिल क्रान्तिकारीका अध्यक्ष रञ्जित तामाङले ‘मौसमी राष्ट्रवादी’ले चुच्चे नक्सा लुकाएको आरोप लगाएका छन् ।
बिहीबार राजधानीमा अखिल क्रान्तिकारीको राष्ट्रिय सम्मेलनलाई सम्बोधन गर्दै अध्यक्ष तामाङले ‘मौसमी राष्ट्रवादीहरू देशकै समस्या’ भएको बताएका हुन् ।
उनले भने, ‘हिजो हामी सबैको समर्थन र दबाबमा चुच्चे नक्सा छापिएको थियो, तर त्यो नक्सालाई पुस्तकमा छाप्न र विद्यार्थीहरूलाई अध्ययन गर्न दिइएन । यस्तै मौसमी राष्ट्रवादीहरूका कारण हाम्रो राष्ट्रियता बलियो हुन पाएको छैन ।’
उनले पार्टी एकतासँगै विद्यार्थी आन्दोलनलाई पनि बलियो बनाउन एकता भए पनि मौसमी राष्ट्रवादीकै कारण एकता खल्बलिएको बताए ।
