१७ असोज, काठमाडौं ।
सत्तारुढ गठबन्धनको घटक नेकपा माओवादी केन्द्रका अध्यक्ष पुष्पकमल दाहाल‘प्रचण्ड’ले मन्त्रिपरिषद् विस्तारका क्रममा मन्त्री हुनेहरुको आज (आइतबार) नै टुंगो लाग्ने बताएका छन्।
प्रचण्डका अनुसार नवनियुक्त मन्त्रीहरुले सोमबार शपथ लिनेछन्। पार्टी कार्यालय पेसिसडाँडामा आयोजित अखिल नेपाल किसान महासंघ (क्रान्तिकारी)को केन्द्रीय समितिको बैठकलाई सम्बोधन गर्दै प्रचण्डले सबै पार्टीबाट मन्त्री हुनेको लिस्ट आजै तयार हुने दाबी गरेका हुन्।
‘मन्त्रिपरिषद् विस्तार नभएको भनेर निक्कै आलोचना भइरहेको छ। आज बिहान पनि मन्त्रिपरिषद् विस्तारका विषयमा छलफल भएको थियो,’ प्रचण्डले भने, ‘आज मन्त्री हुनेको सबै लिष्ट फाइनल हुन्छ। सम्भवतः सोमबार सबै मन्त्रीको सपथ हुन सक्छ।’
कांग्रेस सभापति शेरबहादुर देउवा नेतृत्वमा गत असार २९ गते गठन भएको सरकारमा अहिले ५ जना मन्त्री र १ जना राज्यमन्त्री छन्। २ दर्जन मन्त्रालयको जिम्मेवारी देउवाले आफैंसँग राखेका छन्।
